46 тарвагыг ариутгал, халдваргүйжүүлэлт хийж устгажээ

ФОТО МЭДЭЭ
185@montsame.mn
2019-11-21 11:34:33

Говь-Алтай /МОНЦАМЭ/ Говь-Алтай аймгийн Халиун сумын харьяат иргэний хууль бусаар агнасан 46 тарвагыг ариутгал, халдваргүйжүүлэлт хийж устгасан тухай тус аймгийн Зоонозын өвчин судлалын төвөөс мэдээлэв.

Тодруулбал, хууль бусаар агнасан дээрх тооны тарвагыг худалдаалахыг завдаж байсан үйлдлийг Говь-Алтай аймгийн Мэргэжлийн хяналтын газар хураан авч, Зоонозын өвчин судлалын төвд устгуулахаар 11-р сарын 19-ний өдөр авч ирж өгсөн байна.

Тухайн өдөрт 46 тарваганы хүйсийг тодорхойлон лабораторид дээж материал авч 0.1% -ийн жавелионы уусмалаар тарваганд халдваргүйжүүлэлт хийж тусгай цооногт хийн хлорын шохойн нунтгаар дарж устгалд оруулав. 46 тарвага нь бүгд эр хүйсийнх байжээ. Уг устгал, ариутгалын ажиллагааг Зоонозын өвчин судлалын төвийн ариутгагч Ц.Мөнхдөл хийж, ажлын гүйцэтгэлд лаборант Б.Батзаяа хяналт тавьж хамтран ажиллажээ.

46 тарваганы зарим нь муудах шинжтэй болж нялзран задарч, зөөлөн эд мах гоожсон төлөв байдалтай байжээ.