М.Дөлгөөн, А.Батцэцэг нар Дели хотноо тивийн АШТ-д үзүүрлэв
МОНГОЛЫН МЭДЭЭ | СПОРТУлаанбаатар /МОНЦАМЭ/. Энэтхэгийн Шинэ Дели хотноо үргэлжилж буй чөлөөт бөхийн насанд хүрэгчдийн Ази тивийн 2020 оны АШТ-ний эхний өдөр Налайх дүүргийн харьяат, ОУХМ Мөнхболдын Дөлгөөн эмэгтэйчүүдийн 55 кг-ын жинд мөнгөн медалиар Монголын багийн амжилтын салхийг хагалав.
Тэрбээр хэсгийн эхний барилдаанд Казахстаны Марина Зуевад 8:11-ээр ялагдсан ч удаах барилдаанд БНСУ-ын Ким Жин Хи, хагас шигшээд 2019 оны Японы аварга Кана Хигашикаваг тус бүр цэвэр ялсан. Алтан медалийн төлөөх барилдаанд эзэн орны Пинкитэй хүч үзэж 1:2-оор ялагдав. М.Дөлгөөн өнгөрсөн жил БНХАУ-ын Шианьд болсон тивийн АШТ-ээс хүрэл медаль хүртсэн бөгөөд ийнхүү Делид амжилтаа ахиулж үзүүрлэв.
Харин чөлөөт бөхийн 23
хүртэлх насны ДАШТ-ний мөнгөн медальт, залуучуудын дэлхийн болон Азийн аварга,
“Жакарта-2018” Азийн наадмын хүрэл, Азийн АШТ-ний мөнгө, хүрэл медальт, үндэсний
шигшээ баг, “Хасу-Мегастарс” клубийн тамирчин ОУХМ Алтанцэцэгийн Батцэцэг 59
кг-д мөнгөн медаль хүртэв. Түүний
хувьд сүүлийн гурван жил дараалан тивээсээ медаль /2018 онд Бишкект хүрэл, 2019 онд Шианьд
мөнгөн медаль хүртсэн/ зүүж
байна. А.Батцэцэг хэсгийн барилдаанд Узбекистаны
Гульнора Тошпулатоваг 10:0-ээр, БНСУ-ын Квон Юн Жинийг 8:2-оор, Японы Кон Юүмиг
цэвэр, хагас шигшээд Казахстаны Мадине Бакбергеноваг 5:1-ээр тус тус ялсан. Алтан медалийн төлөөх барилдаанд 2017 оны
Азийн АШТ-ний мөнгөн медальт эзэн орны Сарита Морд 2:3-аар ялагдсан юм.
Эмэгтэйчүүдийн
68 кг-д таван бөх тойргоор
барилдснаас залуучуудын ДАШТ-ий мөнгө, Азийн АШТ-ий мөнгө, хүрэл медальт,
үндэсний шигшээ баг, “Хасу-Мегастарс” клубийн тамирчин ОУХМ Энхсайханы
Дэлгэрмаа хоёр ялж, хоёр ялагдснаар хүрэл медаль хүртэв. Ази тивийн АШТ-д анх удаа зодоглосон тэрбээр өнгөрсөн жилийн залуучуудын дэлхийн
аварга Японы Нарүха Мацүюки, Азийн АШТ-ий мөнгө, хүрэл медальт, эзэн орны Дивья
Какранд ялагдсан ч Узбекстаны Азода Эсбергенова, Казахстаны Албина
Каиржелдинова нарыг цэвэр ялж тивийн аваргаас ийнхүү медаль зүүлээ.
Энэ өдөр хүч үзсэн Монголын 5 бөхөөс хоёр мөнгө, нэг хүрэл медаль хүртэж, хоёр нь хүрэл медалийн төлөөх барилдаанд дийлдэв. 50 кг-д Б.Мөнхнар Узбекстаны Даулетбик Якшимуратовад 3:8-аар, 76 кг-д Г.Ариунжаргал "Рио-2016" олимпын наадмын хүрэл медальт Казахстаны Эльмира Сыздыковад цэвэр ялагдсан.