Улаанбаатар
Чех Улсаас Монгол Улсад суугаа Элчин сайд Ийржи Бродскийг хүлээн авч уулзлаа
МОНГОЛЫН МЭДЭЭ | ГХЯ-НЫ МЭДЭЭ
Улаанбаатар /МОНЦАМЭ/. Монгол Улс, Бүгд Найрамдах Чех Улс хооронд дипломат харилцаа тогтоосны 70 жилийн ойг тохиолдуулан Гадаад харилцааны сайд Д.Цогтбаатар Бүгд Найрамдах Чех Улсаас Монгол Улсад суугаа Элчин сайд Ийржи Бродскийг өнөөдөр хүлээн авч уулзлаа.
Уулзалтын эхэнд Гадаад харилцааны сайд Д.Цогтбаатар Монгол Улс, Бүгд Найрамдах Чех Улс хооронд дипломат харилцаа тогтоосны 70 жилийн ойг тохиолдуулан Монгол Улсын Ерөнхийлөгч, Ерөнхий сайд болон Гадаад харилцааны сайд нараас илгээж буй баярын захидлыг Элчин сайдад гардуулав. Түүнчлэн Монгол, Чехийн харилцаа, хамтын ажиллагаа бидний хамтын хүчин чармайлтаар амжилттай бэхжин хөгжиж ирснийг цохон тэмдэглээд хоёр талын худалдаа, хөрөнгө оруулалт, иргэд хоорондын хамтын ажиллагаа цаашид улам өргөжин хөгжинө гэдэгт итгэлтэй байгаагаа илэрхийллээ.
Элчин сайд И.Бродский хоёр улсын худалдаа, эдийн засгийн харилцааг эрчимжүүлэх, төрөлжүүлэх чиглэлээр хэрэгжүүлж байгаа үйл ажиллагааныхаа талаар мэдээлэл өгч, дипломат харилцаа тогтоосны 70 жилийн ойн хүрээнд хамтран хэрэгжүүлэх айлчлал, арга хэмжээний талаар санал солилцов.
Гадаад харилцааны сайд Д.Цогтбаатар 2019 оны 5 дугаар сард Чех Улсад хийсэн айлчлалынхаа үеэр тус улсын холбогдох албан тушаалтнуудтай ярилцаж, тохиролцсоны дагуу Интерполийн Гүйцэтгэх хорооны дэд Ерөнхийлөгч болон Чех Улсын Цагдаагийн байгууллагын төлөөлөгчид энэ зун Монгол Улсад айлчилж, хоёр улсын хууль сахиулах байгууллага хоорондын харилцааг өргөжүүлэх, харилцан мэдээлэл солилцох зэргээр хамтран ажиллахаар болсон юм.
