Улаанбаатар /МОНЦАМЭ/. НЗДТГ, Зүүн хойд Азийн хотуудын дарга нарын 4 дэх удаагийн форумыг Ковид-19 цар тахлын үед хотуудын сайн туршлагыг солилцон, хүндрэлийг даван туулж, хамтын ажиллагааг бэхжүүлэх нь” сэдвээр зохион байгууллаа.  

НЗДТГ Азийн сан хамтран 2014 оноос хойш 2 жил тутам тодорхой сэдвийн хүрээнд зохион байгуулж ирсэн юм.

Энэ удаагийн форумыг нээж Нийслэлийн Засаг даргын Хөгжлийн бодлогын асуудал хариуцсан нэгдүгээр орлогч Ж.Сандагсүрэн үг хэлсэн бол Сөүл хотын даргын үүрэг гүйцэтгэгч Сео Жёонг Хюб, ДЭМБ-ын Номхон далайн Баруун бүсийн захирал Доктор Такеши Касай нар мэндчилгээ дэвшүүлсэн юм.  

Ковид-19 цар тахлын үед Улаанбаатар хотоос хэрэгжүүлж байгаа бодлого, хариу арга хэмжээг Нийслэлийн Засаг даргын Хүний хөгжил, нийгмийн бодлогын асуудал хариуцсан орлогч Н.Баярчимэг танилцуулав.

Тэрбээр “Монгол Улс нь гадаадад байгаа иргэдээ татан авснаар зөвхөн зөөвөрлөгдөн орж ирсэн халдварын тохиолдол батлагдсан байв. Цар тахлын дотоодод батлагдсан анхны тохиолдол гарснаар нийслэл болон зарим аймаг энэ оны 11 дүгээр сарын 13-наас гамшгаас хамгаалах бүх нийтийн бэлэн байдлын зэрэгт шилжиж, улмаар хөл хориог 12-р сарын 11 хүртэл хэсэгчлэн сунгасан. Коронавирусний халдварын батлагдсан тохиолдлын ойрын болон шууд бус хавьтлыг хянах, улмаар цар тахлын түргэвчилсэн болон нарийвчилсан PCR шинжилгээнд иргэдээ хамруулсаар байна. Мөн зайнаас харьцах, хөл хорио тогтоох, олон нийтийн үйл ажиллагааг хязгаарлах нь агаар дуслаар халдвар тархахыг хязгаарлах үр дүнтэй арга болсон” гэлээ. 

Энэ үеэр Москва хотын тээврийн салбарт хэрэгжүүлж буй ажил, Бээжин хотоос коронавирусний цар тахлаас урьдчилан сэргийлэх, хянах чиглэлээр хийсэн ажил, Сөүл хотын захиргаа Ковид-19 цар тахалтай тэмцэж байгаа арга туршлагаа танилцуулав.

Мөн олон улсад болон Номхон далайн баруун бүсэд ковид-19 цар тахлын хүрээнд хэрэгжүүлж буй үйл ажиллагааг  ДЭМБ-ын Манила хот дахь салбарын Эрүүл мэндийн яаралтай тусламж, эрсдэлийн хөтөлбөрийн үнэлгээний менежер Доктор Тамано Мацуй танилцуулж, илтгэл тавив.  

Форумыг хааж НЗД-ын Хөгжлийн бодлогын асуудал хариуцсан нэгдүгээр орлогч Ж.Сандагсүрэн хэлэхдээ, “Цаашид Зүүн хойд Азийн хотууд идэвх зүтгэлтэйгээр, олон талт хамтын ажиллагаа, эв нэгдэлд суурилсан, уялдаатай, үр дүнтэй хариу арга хэмжээг цаг алдалгүй авч, эрүүл мэнд, онцгой байдал, нийгмийн халамжийн оновчтой, үр дүнтэй бодлогоор иргэдийг цар тахлын гамшгийн эрсдэлээс хамгаалж, коронавируст тахлыг таслан зогсооно гэдэгт  итгэлтэй байна. Энэ удаагийн хуралдаанаар хэлэлцэгдсэн ЗХА-ийн форумын дүрмийн баримт бичгээр Улаанбаатар хотын санаачилсан Форумыг бүс нутгийн хотуудын хамтын ажиллагааны байнгын механизм болгох эхлэл тавигдаж байгаад баяртай байна” гэв. 

Форумд Зүүн хойд Азийн бүс нутгийн таван улсын 18 хотын шийдвэр гаргах түвшний хотын удирдлагууд, судлаачид, Элчин сайдууд, олон улсын байгууллагын нийт 80 гаруй төлөөлөгчид цахимаар оролцлоо.