Оргодол цэргүүдийг баривчиллаа

Монголын мэдээ | Хууль
munkhbaatar@montsame.gov.mn
2021-04-11 13:27:15
@s_munkhbaatar

Улаанбаатар /МОНЦАМЭ/. Оргодол цэргүүдийг Говь-Алтай аймгийн Алтай сумын Бадрал багийн нутаг дэвсгэрээс өнөөдөр 10.20 цагт олж тогтоон ямар нэгэн эрсдэлгүй баривчилсан тухай ЦЕГ-ын Хэвлэл, мэдээллийн төвийн дарга, хурандаа Б.Баатархүү мэдээлэв.


Энэ сарын 8-ны 18.00 цагийн орчимд Говь-Алтай аймгийн Алтай сум дахь хилийн 0214 дүгээр ангийн дөрөвдүгээр заставт манаанд гарч байсан байлдагч Х, М нар үүргээ гүйцэтгээд, харуулын байран дээр ирж ээлж солих үеэр харуулын даргаа буудан хөнөөгөөд, галт зэвсэг, 45 сумтай оргосон.  Хилийн харуулд хамт үүрэг гүйцэтгэж байсан байлдагч Д, Т нар хилийн салбарын зүг зугтаж, энэ хэргийн талаар мэдээлжээ.


Оргосон байлдагч Х, М нар нь зэвсэглэсэн бөгөөд айлын мотоциклийг гуйж аваад, цааш зугтаасан байна. Алтай сумаас 50 км-ийн зайд "Хонхор заг" гэх газарт унаж явсан мотоциклоо орхисныг нь энэ сарын 9-нд тогтоогоод байсан юм. 


Говь-Алтай аймгийн цагдаагийн газар, тагнуулын байгууллага болон Алтай отрядад байгаа ангийн бие бүрэлдэхүүн хамтран оргосон цэргүүдийг эрэн хайх ажиллагааг явуулсан байна.

Холбоотой мэдээ