Хонконгийн Засгийн газраас “Бүс ба Зам-Монгол Улс” тэтгэлэгт хөтөлбөр бий болгоно

МОНГОЛЫН МЭДЭЭ | ГХЯ-НЫ МЭДЭЭ
ariunbold@montsame.gov.mn
2021-06-18 12:07:14

Улаанбаатар /МОНЦАМЭ/. Монгол Улсаас БНХАУ-ын Засаг захиргааны онцгой бүс Хонконгт суугаа Ерөнхий консул Г.Жаргалсайхан Хонконгийн Боловсролын нарийн бичгийн дарга Кевин Йеунгтэй энэ сарын 17-нд уулзав.


Түүнчлэн уулзалтаар боловсрол, шинжлэх ухааны салбарт хамтран ажиллах тодорхой асуудлаар санал солилцлоо. Талууд цаашид хамтын ажиллагаагаа өргөн хүрээнд эрчимжүүлэхээр тохиролцов.


Мөн уулзалтын үеэр Нарийн бичгийн дарга Кевин Йеунг Монгол Улсын Боловсрол, шинжлэх ухааны яам, Хонконгийн Боловсролын газар хооронд байгуулж буй Санамж бичигт гарын үсэг зурлаа. Санамж бичигт манай талаас Боловсрол, шинжлэх ухааны сайд Л.Энх-Амгалан өмнө гарын үсэг зурсан бөгөөд энэ өдрөөс хүчин төгөлдөр болж байна.


Энэхүү баримт бичгийг байгуулсны үндсэн дээр Хонконгийн Засгийн газраас “Бүс ба Зам-Монгол Улс” тэтгэлэгт хөтөлбөрийг шинээр бий болгож, уг тэтгэлэгт хөтөлбөрийн хүрээнд 2022 оноос эхлэн жил бүр Хонконгийн улсын их, дээд сургуульд суралцах тав хүртэлх монгол оюутанд сургалтын төлбөрийн 100 хувийн тэтгэлэг олгож буйгаа мэдэгдлээ. Нэг оюутны сургалтын төлбөр 200 сая төгрөг байдаг аж.


Дашрамд дурдахад Азийн топ 10 их сургуулийн 3, дэлхийн топ 100 их сургуулийн 5 нь Хонконгийн их дээд сургууль байна.

Холбоотой мэдээ