Улаанбаатар
Эмч, ажилтнууд тэмцлийн дараагийн шат руу шилжихээ мэдэгдэв
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Сүхбаатарын талбайд суулт зарлаад буй, Монголын 66 мянган эмч, ажилтнуудын төлөөлөл өнөөдөр мэдэгдэл хийж цаг үеийн нөхцөл байдлын талаар мэдээллээ.
Тэд өнгөрсөн сарын 29-нд хийсэн хэвлэлийн бага хурлаар:
1. ЭМС-ын ажилтнуудын үндсэн цалинг 2 дахин нэмэгдүүлэх
2. Эмч, ажилтнуудын эрүүл мэнд, амь нас, эрсдэлийн даатгалд
хамруулах
3. Монголын ЭМС-ынхан бүхэлдээ улаан бүс болсон тул Улаан,
Ногоон бүсээр ялгаварлахгүй байх зэрэг асуудлыг нэн даруй шийдвэрлэж өгөхийг хүссэн ч өнөөдрийг хүртэл тодорхой шийдвэр гаргаагүй тул шийдвэр гартал ажил
хаялт зарлахаа мэдэгдэж байна” гэлээ.
Монголын эрүүл мэндийн ажилтны Үйлдвэрчний эвлэлийн
холбооны Гүйцэтгэх зөвлөлийн 3 дугаар хуралдаанаар хэлэлцэн эмч, ажилтнуудын
үндсэн цалинг 2 дахин нэмэгдүүлэх Түр хороог байгуулан нийт эмч ажилтныг
төлөөлөн эвлэлдэн нэгдэх, үгээ хэлж, үзэл бодлоо илэрхийлэх үүргийг хүлээн
тэмцэл хөдөлгөөн өрнүүлээд 8 өдөр болж байгаа юм.
Тэд салбарын сайддаа нөхцөл байдлыг сайжруулах талаар удаа дараа хандсан боловч тодорхой шийдэл гаргаагүй, мөн УИХ, Засгийн газарт шаардлага хүргүүлсэн ч өнөөдрийг хүртэл хариу ирүүлэхгүй, шйдвэр гаргахгүй, үл тоомсорлож байгаад эмч ажилтнууд эрс эсэргүүцэж байна” гэв.
Эрүүл мэндийн салбарын ажилтнуудын цалинг нэмэгдүүлэх Түр хорооны дарга, СЭМҮТ-ийн Үйлдвэрчний эвлэлийн хорооны дарга Ө.Анхболд: “Бид 7 дугаар сарын 1-нээс хойш шаардлагынхаа хариуг авах гэж 8 хоног, янз бүрийн арга хэрэглэн энд сууж байна. Харамсалтай нь өнөөдрийг хүртэл хэн ч анхаарлаа хандуулсангүй. Тиймээс тэмцлийн дараагийн шатанд шилжиж байна. 2020 оны 11 дүгээр сарын 11-нээс хойш эрүүл мэндийн салбар өндөр ачаалалтай, өндөржүүлсэн бэлэн байдалд ажиллаж байгаа ч хэн ч хойш сууж, ухарч няцаагүй. 2021 оны нэгдүгээр улиралд улсын дундаж цалин 1 390 000 төгрөг хүрснийг холбогдох хүмүүс бахархалтай зарласан. Харин Эрүүл мэндийн салбарынхны дундаж цалин 647 мянган төгрөг юм. Өөрөөр хэлбэл, эрүүл мэндийн салбарын дундаж цалинг 2 дахин нэмэгдүүлсэн ч улсын дундаж цалингийн хэмжээнд хүрэхгүй. Эмч, сувилагч, асрагч, ажилтнууд 3-5 дахин их ачаалал дунд, гэртээ ч харьж чадахгүй бүх хүчээ дайчилж ажиллаад улсын дундаж цалинд хүрэхгүй цалинтай байгаа нь шударга бус. Энэ нь 66 мянган хүний үзэл бодлын илэрхийлэл юм шүү” гэлээ.
Энэ үеэр УИХ-ын гишүүдийн төлөөлөл ирж тэднийг дэмжиж байгаа гэдгээ илэрхийлсэн юм.
