Улаанбаатар
ДАШТ-ний 3 хүрэл медальт Б.Шоовдорт хүндэтгэл илэрхийлэв
МОНГОЛЫН МЭДЭЭ | СПОРТ
Улаанбаатар /МОНЦАМЭ/. “Аврагч” биеийн тамир техник спорт хороо 120 дугаар ангийн бие бүрэлдэхүүн баасан гарагт /2021.10.15/ чөлөөт бөхийн дэлхийн аварга шалгаруулах тэмцээний 3 хүрэл медальт ОУХМ Б.Шоовдорт хүндэтгэл илэрхийлж баяр хүргэлээ.
Дэд хурандаа П.Бүрэнтөгс захирагчтай ОБЕГ-ын харьяа “Аврагч” БТТСХ-ны 120 дугаар ангийн тамирчин, ОУХМ Б.Шоовдор 2021 оны 10 дугаар сарын 2-8-нд болсон “Осло-2021” ДАШТ-ий 59 кг-ын жинд барилдан хүрэл медалийн эзэн болж Монгол Улсынхаа болон Онцгой байдлын байгууллагын нэр хүндийг өндөрт өргөсөн билээ.
Б.Шоовдор сүүлийн зургаан жил ДАШТ-д тасралтгүй оролцож, 4 дэх удаагаа медалийн төлөө барилдаж 3 дахь хүрэл медалиа хүртсэн дэлхийн шилдэг тамирчин юм.
Тэрбээр “Будапешт-2018,
“Нур-Султан-2019” ДАШТ-ний хүрэл, Азийн АШТ-ний хошой мөнгө, нэг хүрэл медальт,
Иван Ярыгиний “Алтан Гран при” болон “Mongolia Open” олон улсын тэмцээний 3
удаагийн аварга, Польшийн нээлттэй тэмцээн, Александр Медведь, Сассаригийн олон
улсын тэмцээний аварга болж байв.
