Улаанбаатар
Мөсөн дээгүүр явах болон авто тээвэр хийхгүй байхыг анхааруулж байна
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Он гарсаар гол, нуурын мөс цөмөрсөн 16 тохиолдол бүртгэгдэж, 4 иргэн амь насаа алджээ. Дуудлагын 11 нь өнгөрсөн 10-11-р саруудад бүртгэгдсэн байна.
Цаг уурын байгууллагын ирүүлсэн мэдээллээр 12-р сарын хоёрдугаар арав
хоногийн байдлаар манай орны ихэнх гол мөрөн битүү мөсөн бүрхүүлтэй болсон
хэдий ч олон жилийн дундаж болон өмнөх оны мөн үеийнхээс 10-50 см нимгэн, гол
мөрний нийт уртын дагууд мөсний зузаан харилцан адилгүй байна.
Мөн 12-р сард агаарын температур ихэнх нутгаар
олон жилийн дунджаас дулаан, харин нутгийн баруун өмнөд хэсгээр дунджийн орчим
байх төлөвтэй байна.
Хэдийгээр ихэнх нутгаар олон жилийн дунджаас
дулаан байх боловч цаг агаар таатай байх үеүдэд агаарын температур өдөртөө
нэмэгдэж цас мөс хайлж, цаг агаарын муудалтын үеүдэд агаарын температур буурч,
огцом хүйтрэлт ажиглагдах нөхцөл бүрдэх тул хөрсний гадарга хөлдөх, халтиргаа
гулгаа ихсэх магадлалтай байгаа юм.
Иймд мөсний даац хүн, мал, машин тэрэг явахад
хангалттай хэмжээнд хүрч бэхжээгүй байгаа тул цаг хожих, зам товчлох зэргээр
мөсөн дээгүүр явах болон авто тээвэр хийхгүй байхыг ОБ-ын байгууллагаас
онцгойлон анхааруулж байна.
