Улаанбаатар
Орхоны хөндийг Шим мандлын нөөц газарт бүртгүүлэх асуудлыг хэлэлцэв
ОРОН НУТГИЙН МЭДЭЭ | АРХАНГАЙДолдугаар сарын 26-29-нд Хархорумд болсон “Монгол Улс дахь нутгийн иргэдэд түшиглэсэн намаг хамгаалах, ухаалаг ашиглах стратеги” зөвлөлгөөнөөр Орхоны хөндийг Шим мандалын нөөц газарт бүртгүүлэх асуудлыг урьдчилан хэлэлцлээ.
Оролцогч талуудад Рамсарын конвенцид бүртгэлтэй газар нутаг, шим мандлын нөөц газрын талаарх ойлголтыг гүнзгийрүүлж,тэдгээрийн менежентийн төлөвлөгөөнд НАМА-г хэрэгжүүлэхтэй холбоотой хүлэрт намгийг хамгаалах, нөхөн сэргээх ухаалаг ашиглахад чиглэсэн үйл ажиллагааны талаар мэдээлэл өгөв. Зөвлөлгөөнд “Wetlands international”-ОУБ, Өвөрхангай, Архангай аймгийн Хархорин, Өгийнуур, Хашаат сумын ЗДТГ, Цайдам багийн иргэд, Орхон Чулуут голын сав газрын захиргаа, Хангайн нурууны байгалийн цогцолборт газрын хамгаалалтын захиргаа, Архангай аймгийн БОАЖГ, БОАЖЯ, ШУА-ийн ерөнхий ба сорилын биологийн хүрээлэн, Рамсарын үндэсний хороо, МАВ-ын үндэсний хороо, “Хүлэрт намгийг хамгаалах стратегийн төлөвлөлт” –төслийн багийнхан оролцлоо.
Зөвлөлгөөнд зохион байгуулагчид онол аргазүйн талаар илтгэл тавьж, мэдээлэл хийснээс гадна хээрийн судалгаатай танилцаж, дэлхийн соёлын өвд бүртгэгдсэн Архангай аймгийн Өгийнуурыг үзэж, Хашаат сумын Цайдам багт хийгдэж байгаа нөхөн сэргээлтийг сонирхох, хээрийн аялал зохиов.
“Wetlands international”-ОУБ-ын төлөөлөл Татьяана Минаева хэлсэн үгэндээ, “Хүлэрт намаг нь дэлхийн нийт газрын гадаргын гурваас илүү хувийг эзэлдэг. Бараг бүх улс оронд хүлэрт намаг бүхий талбай байдаг бөгөөд экосистемд онцгой үүрэг гүйцэтгэж үйлчилдэг. Гэтэл үүнийг хамгаалах асуудлыг улс гүрнүүд үл хайхарч, үндэсний бодлогод тусгалгүй орхигдуулсаар ирсэн”хэмээн шүүмжлэн газрын зурагт суурилсан тооллогын дүнгээс үзэхэд хүлэрт намаг бүхий талбай нь Монгол орны нийт нутаг дэвсгэрийн дөнгөж 2 хувийг эзэлж байгааг сэрэмжүүллээ.
Хүлэрт намаг нь уур амьсгалын өөрчлөлтийг сааруулах, түүнд дасан зохицох, биологийн төрөл зүйл болон ус, намхархаг газрыг зохистой түвшинд хадгалахад чухал үүрэг гүйцэтгэдэг аж.
Архангай аймаг Л.Булган
