“Хүнсний хангамж, аюулгүй байдал” үндэсний хөдөлгөөний хүрээнд “Өгөөж-Чихэр боов” ХХК-д ажиллалаа

МОНГОЛЫН МЭДЭЭ | УЛС ТӨР
bolor@montsame.mn
2022-06-10 11:47:56

Улаанбаатар /МОНЦАМЭ/. Монгол Улсын Ерөнхийлөгч У.Хүрэлсүх “Хүнсний хангамж, аюулгүй байдал” үндэсний хөдөлгөөний хүрээнд хүнсний манлай үйлдвэр “Өгөөж-Чихэр боов” ХХК-д ажиллалаа.

Компанийн ерөнхий захирал С.Түмэнгэрэл, “Хүнсний хангамж, аюулгүй байдал” үндэсний хөдөлгөөн цаг үеэ олсон. Иргэд нь эрүүл, ажилтай, орлоготой, үндэсний үйлдвэрлэл хөгжих боломжхэмээн дэмжиж байгаагаа илэрхийллээ.

Хамгийн гол нь төр, засгийн бодлого, шийдвэр тодорхой, тогтвортой байх, төрийн бүх шатны байгууллага, хувийн хэвшил, иргэд хамтрах, төрийн байгууллагууд хоорондын уялдаа холбоо чухал гэдгийг дурдав.

86 жилийн түүхтэй тус компани 165 төрлийн нэрийн бүтээгдэхүүнтэй, өдөрт 40 гаруй тн бүтээгдэхүүн үйлдвэрлэдэг бөгөөд Улаанбаатар хотын нарийн боовны зах зээлийн 70 хувийг хангадаг.

Гэвч түүхий эд, материалын үнэ, валютын ханш, дотоод, гадаад тээврийн зардал өсөж байгаа нь хүндрэл учруулж байна. Үндсэн болон туслах түүхий эд, материал, сав баглаа боодлын 90 гаруй хувийг гадаадаас валютаар худалдан авдаг нь бүтээгдэхүүний өртөгт нөлөөлөх болжээ.

НӨАТ-ыг таван хувь болгох, хүнсний үйлдвэр барих бол урт хугацаатай, бага хүүтэй зээлээр дэмжих, хавтгайрсан халамжийн бодлогыг эргэж харах, Нийгмийн даатгалын шимтгэл төлдөг хэсгээ түлхүү дэмжих, ажлын байр бий болгосон тохиолдолд татварын хөнгөлөлт, чөлөөлөлт үзүүлэх нь зүйтэй гэж үздэгээ ерөнхий захирал С.Түмэнгэрэл тодотгов.

“Өгөөж-Чихэр боов” компани 500 гаруй ажиллагсадтай бөгөөд 60 гаруй хувь нь эмэгтэйчүүд юм.

Бүх бүтээгдэхүүнээ шат дамжлага бүрт нь технологийн болон лабораторийн иж бүрэн хяналтад хамруулдаг. Мөн улирал тутам хөндлөнгийн хяналтын лабораторид шинжлүүлж, чанарын баталгаажуулалт хийлгэдэг юм байна.

Жил бүр улсын төсөвт тав орчим тэрбум төгрөгийн татвар, шимтгэл төвлөрүүлдэг юм.

Холбоотой мэдээ