Улаанбаатар
Хоккейчид 2023 онд эх орондоо тивийн тэмцээн зохион байгуулна
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Хоккейн спортын 18 хүртлэх насны /U18/ тамирчдын Ази, Номхон далайн орнуудын аварга шалгаруулах тэмцээнийг 2023 оны 2 дугаар сарын 26-наас 3 дугаар сарын 5-нд Улаанбаатар хотноо зохион байгуулахаар болсон байна.
Ази, Номхон далайн орнуудын Олон улсын шайбтай хоккейн
холбооны /IIHF/-ны гишүүн үндэсний холбооны төлөөлөгчидтэй IIHF-гийн Ази,
Номхон далайн стратеги төлөвлөлтийн бүлэг Абу Даби хотод олон улсын шинэ
улиралд бэлтгэхийн зэрэгцээ Ази, Далайн бүс нутгийн стратегийн шинэ төлөвлөгөө
ICE 26-г үнэлж, зохицуулах уулзалт хийх үеэр дээрх шийдвэрийг гаргажээ.
Монгол Улсад болох
тус тэмцээнд Индонези, Энэтхэг, Иран, Макао /Хятад/, Монгол, Сингапур, Тайланд,
Арабын Нэгдсэн Эмират, Узбекистаны шигшээ багууд өрсөлдөх юм. Дээр дурдсан 9
багийн 198 тамирчид болон шүүгчид, албаны зочид төлөөлөгчид зэрэг 400 гаруй хүн
Монголд хүрэлцэн ирэхээр болжээ. Монголын хоккейн холбоо эх орондоо 18 хүртэлх насны залуу хоккейчдын тэмцээнийг хүлээн авч зохион байгуулах
өндөр хариуцлага хүлээгээд байна.
