Улаанбаатар
Хүмүүнлэг, нийгмийн салбарт хамтын ажиллагаагаа тэлнэ
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Нийслэлийн Засаг дарга бөгөөд Улаанбаатар хотын Захирагч Д.Сумъяабазар БНХАУ-ын нийслэл Бээжин хотод албан томилолтоор ажиллаж, тус хотын дарга Ин Юнтай уулзлаа.
Уулзалтаар
хоёр тал хүмүүнлэг, нийгэм, эдийн засаг, бизнесийн хамтын ажиллагаагаа
өргөжүүлэх талаар хэлэлцэж тохирсныг НЗДТГ-ын Хэвлэл мэдээлэл, олон нийттэй харилцах хэлтэс мэдээлэв.
Нийслэлийн Засаг дарга бөгөөд Улаанбаатар хотын Захирагч Д.Сумъяабазар ярихдаа, БНХАУ-ын нийслэл Бээжин хоттой 2014 онд Ах дүү хотын харилцаа тогтоосон, ирэх онд 10 жилийнх нь ой болно. Энэ хугацаанд хоёр хот олон салбарт өргөн хүрээтэй хамтран ажилласаар ирлээ. Бээжин хот цар тахлын дараа иргэд нь хэвийн амьдралдаа эргэн орсон, хөл хөдөлгөөнтэй, эдийн засаг, бизнес нь сэргэн идэвхжиж байгаа үед бид энд уулзаж байна.
Цаашид хоёр хот хүмүүнлэг, нийгмийн салбарт хамтын ажиллагаагаа тэлэх талаар хэлэлцлээ. Тухайлбал, боловсон хүчний бодлогын түвшний хамтын ажиллагааны хүрээнд төрийн албан хаагчдыг чадавхжуулах, сургалтад хамруулахаар болсон. Мэдээж, эдийн засаг, бизнесийн харилцаагаа эрчимжүүлэх, Улаанбаатар хотын бүтээн байгуулалтад Бээжингийн аж ахуйн нэгж, компаниудыг оролцуулах талаар хэлэлцэж тохирлоо хэмээв.
Энэ үеэр Бээжин хотын
дарга Ин Юн Нийслэлийн Засаг дарга бөгөөд Улаанбаатар хотын Захирагч
Д.Сумъяабазарыг хүрэлцэн ирсэнд талархал илэрхийлж, цаашид хамтын ажиллагаагаа
бүхий л түвшинд эрчимжүүлэхээ илэрхийлсэн юм.
