Улаанбаатар
СЭЛЭНГЭ: Хулан хатны төрсөн нутаг
ӨВ СОЁЛ
Сүхбаатар,
2024 оны тавдугаар сарын 29 /МОНЦАМЭ/. Сэлэнгэ
аймаг нь Хулан хатны төрсөн нутаг юм.
Тус
аймгийн төв Сүхбаатар хотоос баруунтаа орших "Сайханы хөтөл" хэмээх
үзэсгэлэнт газарт ширээний зууван тавцан мэт том хадыг өнөөгийн Монголын газрын
зурагтай төстэй байдлаар засаж янзалсан байдаг.
Түүн дээр
Чингис хаан, Хулан хатан нарын хөргийг сийлж дэргэд нь кирилл үсгээр “Энэ
дэлхийн мянганы суут хүн Эзэн дээд Чингис хаан энэ дагшин амгалан нутгаас Хулан
хатнаа залсан билээ” хэмээн бичжээ.
“Монголын
нууц товчоо”-нд өгүүлснээр 13 дугаар зууны үед Монголын өнөөгийн хойд хилийн
төв хэсэг болох Сэлэнгэ аймгийн нутгаар Хори түмид, Баргажин будгажин,
Хэрэмчин, Жүрхэн, Чонос зэрэг гуч гаруй хүчирхэг аймгууд нутаглаж байсны нэг нь
Мэргид аймаг байв. Тус аймгийг түүхэнд “Гурван мэргид” хэмээн тэмдэглэн
үлдээжээ.
Гурван мэргид хэмээхийн учир нь Удуйд мэргид, Увас мэргид, Хаад мэргид хэмээх гурван овгоос бүтсэн Монгол аймгийн нэгэн холбоо байсан бөгөөд Увас мэргидийн тэргүүн нь Дайр-Усун, Удуйд мэргидийн тэргүүн Тогта бэхи, Хаад мэргидийн тэргүүн нь Хаатай Дармала ажгуу.
Чингис хаан 1189-1206 онуудад дээрх аймгуудыг нэгтгэн Их
Монгол улсын харьяат болгоход Увас мэргидийн тэргүүн Дайр-Усун Чингис хаантай
байлдах санаагүй хэмээн өөрийн охин Хуланг хатан болгон өгч Их Монгол Улсад
дагаар оржээ.
