Улаанбаатар
Уламжлалт “Улаанбаатарын мөнгөн шөнө-2024” цэнгүүн 21:00 цагт эхэлнэ
МОНГОЛЫН МЭДЭЭ | НИЙГЭМ
Улаанбаатар, 2024 оны арванхоёдугаар сарын 30 /МОНЦАМЭ/. Нийслэлээс жил бүр шинэ жилийн баярын өдрүүдэд есөн дүүрэг болон Д.Сүхбаатарын талбайд олон нийтэд зориулсан үйл ажиллагаа зохион байгуулдаг уламжлалтай билээ.
2001 оноос хойш жил бүр он солигдох мөчид Д.Сүхбаатарын талбайд шинэ оноо угтахаар цугларсан иргэдэд зориулан “Улаанбаатарын мөнгөн шөнө-2024” урлагийн тоглолтыг зохион байгуулж ирсэн. Энэ уламжлалын дагуу “Улаанбаатарын мөнгөн шөнө-2024” баярын тоглолтыг Д.Сүхбаатарын талбайн төв тайзнаа энэ сарын 31-ний 21:00-00:00 цаг хүртэл зохион байгуулна. Шинэ жилийн баярын нэгдсэн тоглолтоос гадна төв талбайд тус өдрийн 18:00-24:00 цагт дулаан тохилог асарт урлагийн тоглолт, худалдаа үйлчилгээ, халуун хоолны явуулын цэгүүд ажиллах аж. Худалдаа, үйлчилгээ эрхэлж буй газруудад улсын (ахлах) байцаагч, албан хаагчид хяналт тавьж, хүнсний аюулгүй байдлыг хангуулж ажиллахаас гадна эмнэлгийн яаралтай тусламжийн баг бэлэн байдлыг ханган ажиллана.
Олон нийтийн үйл ажиллагааг хамарсан үйл ажиллагааны үеэр хүүхэд хамгааллын хөдөлгөөнт үйлчилгээ буюу шар хантаазтай мэргэжилтнүүд ажиллаж эрсдэлд өртсөн, эцэг, эх асран хамгаалагчаасаа төөрсөн хүүхдийг нийслэлийн Соёлын төв өргөөний нэгдүгээр давхрын 104 тоотод түр байршуулах, хүүхэд хамгааллын үйлчилгээ үзүүлэх аж. Мөн иргэдийн аюулгүй байдлыг хангах үүднээс гал түймрийн болзошгүй аюулаас хамгаалах онцгой байдлын 70 алба хаагч гал унтраах зориулалтын 2 авто машинтай, он солигдох мөчид ёслолын буудлага хийх үеийн аюулгүй байдлыг хангуулан хамгаалалт, зохицуулалтын ажлыг хийж гүйцэтгэх юм. Д.Сүхбаатарын талбай болон бага тойруугаар 107, замын хөдөлгөөний аюулгүй байдлыг хангах чиглэлээр цагдаагийн 485 алба хаагч гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангана.
Түүнчлэн
“Улаанбаатарын мөнгөн шөнө-2024” баярын тоглолт, шинэ жилийн баярын цэнгүүний дараа 18 их багтаамжийн автобус Д.Сүхбаатарын талбайн баруун, зүүн
болон урд зогсоолуудаас 18 чиглэлд Шархад, Офицеруудын ордон, Жанжин клуб,
Улиастай, Сэлбэ амралт, Толгойт, Улаанчулуут, Орбит, Зүүн салаа, Баруун салаа, таван
шар, Зайсан, Нисэх, Яармаг, 3, 4-р хороолол, Хайлааст, Чингэлтэй /Зүрх уул/,
Баянхошуу чиглэлд үнэ төлбөргүй үйлчилнэ.
