Улаанбаатар
Хамгийн өндөр орлоготой клубүүдийн жагсаалтыг “Реал Мадрид” тэргүүлжээ
ДЭЛХИЙН МЭДЭЭ | СПОРТ
БАРСЕЛОНА, 2025 оны нэгдүгээр сарын 23 /Anadolu/. Испанийн “Реал Мадрид” клуб 2023-24 оны улирлын орлого нь нэг тэрбум еврод хүрсэн хөл бөмбөгийн анхны клуб болжээ.
“Deloitte” аудитын компаниас гаргасан “Football Money League 2025” судалгаагаар “Реал Мадрид” клуб 2023-24 оны улиралд 1.05 тэрбум еврогийн орлого олсноор өмнөх оны адилаар хамгийн өндөр орлоготой клубүүдийн жагсаалтыг тэргүүлсэн байна.
Тус клуб “Сантьяго Бернабеу” цэнгэлдэх хүрээлэнгээ засварласны дараа тасалбарын борлуулалтаас олсон орлого нь 103 хувиар нэмэгдсэн бол шууд дамжуулах эрхээс 316 сая евро, ивээн тэтгэгчийн гэрээнээс 482 сая еврогийн орлого олжээ.
Өнгөрсөн улиралд “Реал Мадрид” 831 сая еврогийн орлогоор уг жагсаалтыг тэргүүлж байсан юм. Клубийн энэ улирлын нийт орлого нэг тэрбум еврогийн босгыг давж, 26 хувиар өссөн байна.
Жагсаалтын хоёрдугаарт Английн “Манчестер Сити” 838 сая еврогийн орлогоор бичигдсэн бол 806 сая еврогийн орлого олсон Францын “Пари Сен Жермен” клуб гуравдугаарт оржээ.
