Улаанбаатар
БАЯНХОНГОР: Богд сумын нутагт 3.6 магнитудын хүчтэй газар хөдөллөө
ОРОН НУТГИЙН МЭДЭЭ | БАЯНХОНГОР
Баянхонгор, 2025 оны гуравдугаар сарын 19 /МОНЦАМЭ/. Баянхонгор аймгийн Богд сумын нутагт энэ сарын 18-ны 20:17:12-д 3.6 магнитудын хүчтэй газар хөдлөлт бүртгэгдсэнийг ШУА-ийн Одон орон, геофизикийн хүрээлэнгээс мэдээллээ.
Газар зүйн байршил (өргөрөг, уртраг) : 45.02 100.35 бөгөөд газар хөдлөлтийн төвөөс ойр орших сумд нь Баянхонгор аймгийн Баянговь сумын төвөөс хойд зүгт 32 км, Богд сумын төвөөс баруун урд зүгт 39 км, Жинст сумын төвөөс баруун урд зүгт 47 км юм.
Богд сумын Алтай 3 дугаар багийн Хүрэн шавхын нуруу гэдэг газар нь Улаанбаатар хотоос 770 км, аймгийн төвөөс баруун урд зүгт 170 км-т оршдог. Тус аймгийн Богд багийн Засаг даргын орлогчоос тодруулахад иргэдэд газар хөдлөлтийн чичирхийлэл мэдрэгдээгүй, учирсан хохиролгүй тухай мэдээлэв.
Монголд болсон газар хөдлөлтийн хамгийн томд тооцогдох газар хөдлөлт 1957 оны 12 дугаар сарын 4-ний 11 цаг 38 минутад тус сум буюу Баянхонгор аймгийн Богд сум, Их богдын нуруунд бүртгэгдэж байжээ. Газар хөдлөлтийн хүч 8-9 магнитуд /11-12 балл/ байсан бөгөөд одоо хүртэл газар хөдлөлтийн хагарал нь хэвээрээ төдийгүй тус ууланд газар хөдлөлтөөс үүссэн нуур ч байдаг. Энэ газар хөдлөлтөөс их, бага Богдын нурууд ба Бахар уулын ар, өвөр бэл, ёроолыг дагаж зүүн өмнөөс баруун хойш үргэлжилсэн ан цавууд үүсэж тогтсон байдаг бөгөөд уртаараа 130 км орчим газрыг хамарсан байдаг.Ташрамд, Дэлхийн гүн дэх чулуулаг агшилт, суналтад орох үед үүссэн энерги, тухайн чулуулаг тасарч эвдрэх үед хагарлын хавтгайн дагуу чөлөөлөгдөх үзэгдэлтэй холбоотойгоор газар хөдлөлт үүсдэг бол магнитуд гэдэг нь газар хөдлөлтийн төвд багажаар хэмжсэн үзүүлэлт бол юм.
Газрын хөрсөн дээр хүн болон барилга байгууламжид нөлөөлөх хүчийг баллаар хэмждэг бөгөөд газар хөдлөлтийн баллын хэмжээ 3-4 байвал хүнд мэдрэгдэх боломжтой, 6 баллаас хэтэрвэл барилга байгууламжид эвдрэл үүсэх магадлалтай, 10-аас хэтэрвэл барилга байгууламж нурах аюултай байдаг байна.
