Улаанбаатар
Хөдөлмөрийн аюулгүй байдал, эрүүл ахуйн салбарын эрх зүйн орчныг шинэчилнэ
МОНГОЛЫН МЭДЭЭ | НИЙГЭМ
Улаанбаатар, 2025 оны дөрөвдүгээр сарын 2 /МОНЦАМЭ/. Хөдөлмөрийн аюулгүй байдал, эрүүл ахуйн тухай хууль, дүрэм, журмыг хэрэгжүүлэх үйл ажиллагааг эрчимжүүлэх, ажлын байрны эрүүл, аюулгүй орчныг бүрдүүлэх зорилготой Хөдөлмөрийн аюулгүй байдал, эрүүл ахуйн аяны нээлт өнөөдөр боллоо.
Манай улсад 2024 онд үйлдвэрлэлийн осол, хурц хордлогод 809 хүн өртсөн нь өмнөх оноос хоёр дахин өсжээ. Үйлдвэрлэлийн осол, мэргэжлээс шалтгаалсан өвчний тохиолдол уул уурхай, барилга, зам, тээврийн салбарт хамгийн өндөр байна. Хөдөлмөрийн аюулгүй байдал, эрүүл мэндийн салбарт хууль, эрх зүйн орчныг сайжруулах, цахим шилжилтийг хэрэгжүүлэх, дэд бүтцийг хөгжүүлэх, тусламж, үйлчилгээг сайжруулах, эрдэм шинжилгээ, судалгаа, статистикийг хөгжүүлэх, мэргэжлийн хүний нөөцийг бэхжүүлэх, хяналтын тогтолцоог сайжруулах зэргийг үе шаттай хэрэгжүүлж эхэлжээ.
Энэ жилийн тухайд Олон улсын хөдөлмөрийн байгууллагаас “Хөдөлмөрийн аюулгүй байдал, эрүүл мэндийн хөгжил: Хиймэл оюун ухааны хэрэглээ ба цахимжилт” уриан дор хөдөлмөрийн аюулгүй байдал, эрүүл ахуйн аяныг орон даяар өрнүүлж байгаа юм. Аяны хүрээнд нэгдүгээр улиралд эрчим хүч, үлдсэн улирлуудад уул уурхай, барилга, зам, тээвэр буюу эрсдэл өндөр салбарт хөдөлмөрийн аюулгүй байдлыг хангах, эрүүл мэндийн стандартын хэрэгжилтийг сайжруулах чиглэлээр төлөвлөгөөт ажлуудыг хийхээр төлөвлөсөн аж.
