Улаанбаатар
СЭЛЭНГЭ: Түймрийн голомтод иргэд болон мэргэжлийн байгууллагынхан ажиллаж байна
ОРОН НУТГИЙН МЭДЭЭ | СЭЛЭНГЭ
Сүхбаатар, 2025 оны
дөрөвдүгээр сарын 29 /МОНЦАМЭ/. Сэлэнгэ аймгийн Зүүнбүрэн суманд
гарсан түймрийн голомтод ОБЕГ-ын тэргүүн дэд дарга бөгөөд Штабын дарга,
хурандаа Ц.Ганзоригоор ахлуулсан Онцгой байдлын байгууллага, мэргэжлийн ангийн
нийт 271 хүн, 30 автомашинтайгаар ажиллаж байна.
Түймрийн голомт руу ОБЕГ-ын харьяа Үндэсний аврах
бригадаас 30 алба хаагч, 3 автомашинтай өнөө өглөө очсон байна. Уг түймэрт
урьдчилсан байдлаар Хушаат суманд 2 гэр, 3 өвөлжөө, нэг ковш өртөж шатжээ.
Мөн Цагааннуур суманд гарсан ойн түймрийн баруун, урд,
зүүн хэсгийг цурамд оруулж, хойд хэсэгт Сэлэнгэ аймгийн Онцгой байдлын газар,
мэргэжлийн ангийн нийт 150 хүн, 27 автомашинтайгаар ажиллаж байна.
Уг түймэрт 2 гэр,
10 өвөлжөө, 1 трактор өртжээ.
