Ulaanbaatar
ДУНДГОВЬ: “Хүнсний аюулгүй байдал” аяныг гурван сар өрнүүлнэ
ОРОН НУТГИЙН МЭДЭЭ | ДУНДГОВЬ
Мандалговь, 2024 оны гуравдугаар сарын 29 /МОНЦАМЭ/. “Хүнсний хангамж, аюулгүй байдал”
үндэсний хөдөлгөөний хүрээнд Хүнс, хөдөө аж ахуй, хөнгөн үйлдвэрийн яамнаас “Хүнсний
аюулгүй байдал” 3 сарын аяныг зохион байгуулахаар боллоо.
Тус аяны нээлтийн ажиллагааг аймгийн Хүнс,
хөдөө аж ахуйн газар, Мал эмнэлгийн газар, Стандарт, хэмжил зүйн хэлтэс хамтран
3 дугаар сарын 27-нд Мандалговь хотод зохион байгуулж, хүнс, хоол үйлдвэрлэл, худалдаа үйлчилгээ эрхлэгчдийн төлөөлөл 60 гаруй хүн
оролцжээ.
Аяны хүрээнд хүнсний чиглэлийн үйл
ажиллагаа явуулдаг аж ахуйн нэгж байгууллагуудад төлөвлөгөөт болон урьдчилан
сэргийлэх хяналт шалгалт хийж, эрсдэлээс сэргийлэх, зөвлөн туслах, зөрчлийг
арилгуулах, чиглэлээр ажиллах ба хэрэглэгчдэд хүнсний аюулгүй байдал, зөв
зохистой хэрэглээ, стандарт, бүтээгдэхүүний чанар, түүнийг хэрхэн таньж
худалдан авалт хийх, хоол, хүнсний гаралтай халдвар, хордлогоос урьдчилан
сэргийлэх талаар мэдлэг олгох сургалт, сурталчилгааг зохион байгуулахаар
төлөвлөжээ.
Түүнчлэн сургуулийн орчинд хүүхдэд
худалдаж байгаа хүнсний бүтээгдэхүүнд
хяналт шалгалт хийж, “Аюулгүй хүнс – Эрүүл үдийн хоол” зөвлөмж боловсруулж, сургуулиудад
хүргүүлэх ажлыг зохион байгуулах юм.
Ташрамд, аймгийн Статистикийн
хэлтсээс 2021 онд хийсэн аж ахуйн нэгж байгууллагын тооллогоор тус аймагт үйл
ажиллагаа явуулдаг 1180 аж ахуйн нэгж байгаагаас 459 нь үйлчилгээ, 348 нь
худалдааны чиглэлээр ажилладаг байна.
