Ulaanbaatar
ДУНДГОВЬ: Оны шилдэг уншигч хүүхдүүдийг шалгарууллаа
ОРОН НУТГИЙН МЭДЭЭ | ДУНДГОВЬ
Мандалговь, 2024 оны арванхоёрдугаар сарын 17 /МОНЦАМЭ/. С.Буяннэмэхийн нэрэмжит аймгийн
төв номын сангаас 2024 оны шилдэг уншигч хүүхдүүдийг шалгаруулж, “Номтой шинэ
жил” уншигчдын сүлд модны наадмыг 18 дахь жилдээ зохион байгууллаа.
Шинэ жилийн баярыг угтан
тус номын сангаас “С.Буяннэмэх тэмдэгтэн”, “Номын сайн нөхөр” болон “Олуулаа
уншъя, номтой нөхөрлөе” аяны шилдгүүдийг шалгаруулж, “Миний уншсан ном дүрслэх
урлагт” уралдаан зарлан дүгнэж, сүлд модны наадмын үеэр шилдгүүдээ шагнаж
урамшуулжээ.
Хүүхэд багачуудыг номтой нөхөрлүүлэх, ном унших хүсэл сонирхлыг нэмэгдүүлэх зорилгоор 2008 оноос “С.Буяннэмэх тэмдэгтэн” шагналыг аймгийн хэмжээнд олгож эхэлснээс хойш 626 хүүхэд энэхүү шагналаар шагнуулсан байна.
2024 онд уг шагналын
эзнээр 38 суралцагч болзол хангаж “С.Буяннэмэх тэмдэгтэн” болжээ.
Түүнчлэн “Олуулаа уншъя,
номтой нөхөрлөе” аяныг 5 дахь жилдээ зохион байгуулж, тус аяны хүрээнд “Ангийн
номын санч” хөтөлбөрийг хэрэгжүүлэн энэ жилийн шилдгүүдээ шалгаруулсан байна.
“Олуулаа уншъя, номтой
нөхөрлөе” аяны “Шилдэг уншигч анги”-аар Хүмүүнлэг сургуулийн Ц.Өнөрцэцэг
багштай 5а анги, Эрдмийн далай сургуулийн Ж.Долгорсүрэн багштай 9а анги, Говийн
ирээдүй сургуулийн М.Нямаа багштай 11а анги шалгарсан бол “Шилдэг ангийн номын
санч хүүхэд”-ээр Эрдмийн далай сургуулийн 9а ангийн сурагч Энхмандалын Энхбат
шалгарчээ.
Мөн энэ үеэр Төв номын
сангаас тодруулдаг тухайн онд хамгийн их ном уншсан “Номын сайн нөхөр”, 14 дэх
жилдээ зохион байгуулж буй “Миний уншсан ном дүрслэх урлагт” уралдааны
шилдгүүдийг шалгаруулж, шагналыг гардууллаа.
“Миний уншсан ном дүрслэх
урлагт” уралдаанд 1700 гаруй хүүхэд бүтээлээ ирүүлснээс Гурвансайхан сумын
сургуулийн 4 дүгээр ангийн суралцагч А.Оюунгоогийн “Үлэг гүрвэлийн ертөнц”,
Дэрэн сумын сургуулийн 7 дугаар ангийн суралцагч М.Үүрийнтуяагийн “Хоёр цагаан юм”, Хүмүүнлэг сургуулийн 12
дугаар ангийн ангийн суралцагч Б.Номинзулын “Төгс төгөлдөр” бүтээл төрөл тус
бүрд тэргүүн байр эзэлжээ.
Уралдааны багийн төрөлд
Эрдмийн далай сургуулийн 4б ангийн хамт олон “Хуруун театр, Дэрэн сумын
сургуулийн 9а ангийн хамт олон “Иогийн адал явдал”, Дэрэн сумаас оролцогч А.Мишээлийн баг “Тамгагүй төр” бүтээлээр шалгарсан байна.
“Номтой шинэ жил” тус наадмын үеэр уралдаанд ирүүлсэн шилдэг бүтээлээр үзэсгэлэн гаргаж, олны хүртээл болголоо.
