Ulaanbaatar
УИХ-ын эмэгтэй гишүүд НҮБ-ын Хүүхдийн сангийн төлөөлөлтэй уулзлаа
МОНГОЛЫН МЭДЭЭ | УЛС ТӨР
Улаанбаатар, 2024 оны арваннэгдүгээр сарын 13 /МОНЦАМЭ/. УИХ-ын эмэгтэй гишүүд НҮБ-ын Хүүхдийн сангийн төлөөлөлтэй энэ сарын 12-нд уулзлаа.
Уулзалтын эхэнд НҮБ-ын Хүүхдийн сангийн төлөвлөлт, хяналт,
шинжилгээ, үнэлгээний ахлах мэргэжилтэн Д.Хүрэлмаа 2023 оны нийгмийн
үзүүлэлтийн түүвэр судалгааны үр дүнг танилцуулсан юм. Тэрбээр уг судалгааг хийхдээ
эрэгтэйчүүдийн асуулгыг хоёр өрх тутмын нэгд амьдарч буй 15-49 насны эрчүүдээс
авсан байна. Мөн
судалгаанд хамрагдсан 5-17 насны хүүхэдтэй өрх бүрээс нэг хүүхдийг санамсаргүй
сонгосон гэв. Нөхөн үржихүй болон эхийн эрүүл мэнд, хүүхдийн эрүүл мэнд, хоол
тэжээл болон хөгжил, боловсрол, хүчирхийлэл, мөлжлөгөөс хамгаалагдсан байдал,
эрүүл, аюулгүй орчинд амьдрах эрх, амьдралын тэгш боломж зэрэг үзүүлэлтээр
судалгааг хийсэн гэж байлаа.
Дараа нь тус байгууллагын Хүүхдийн сангийн зөвлөх
Д.Нарангэрэл Хүний папиллома вирусийн халдвар, дархлаажуулалтын талаарх
мэдээллийг хүргэсэн юм. Тэрбээр хүний папиллома вирусийн дамжих болон сэргийлэх
арга зам, дархлаажуулалтын зорилт, вакцины үр дүнгийн судалгаа зэргийг
танилцуулаад уг вирусээс
сэргийлэхэд хамтран ажиллахыг УИХ-ын гишүүдээс хүссэн юм. НҮБ-ын Хүүхдийн сангийн
мэргэжилтнүүдийн илтгэлтэй холбогдуулан УИХ-ын гишүүд асуулт асууж, хариулт
авсны дараа цаашид хамтран ажиллах талаараа санал солилцлоо.
Уулзалтад УИХ-ын Боловсрол, соёл, шинжлэх ухаан,
спортын байнгын хорооны дарга Ч.Ундрам, УИХ-ын гишүүн С.Замира, Б.Хэрлэн,
М.Сарнай, М.Энхцэцэг, Х.Баасанжаргал, Б.Пунсалмаа, М.Мандухай, Л.Энхнасан,
Б.Мөнхсоёл, М.Нарантуяа, Д.Энхтуяа, А.Ариунзаяа болон НҮБ-ын Хүүхдийн сангийн
суурин төлөөлөгч Эваристе Коуасси-Колман нар оролцлоо гэж УИХ-ын Хэвлэл
мэдээллийн газраас мэдээллээ.
