Мандалговь, 2025 оны нэгдүгээр сарын 7 /МОНЦАМЭ/. Монгол хэлний тухай хуулийн 7.2-т “үндэсний бичгийн хөтөлбөрийг үе шаттай хэрэгжүүлж, зохих бэлтгэл хангасны үндсэн дээр төрийн болон нутгийн өөрөө удирдах байгууллага албан хэргээ кирилл болон үндэсний хос бичгээр хөтлөн явуулна” хэмээн заасан ба энэхүү заалтыг 2025 оны нэгдүгээр сарын 1-ний өдрөөс эхлэн дагаж мөрдөхөөр тусгасан.

Төрийн болон нутгийн өөрөө удирдах байгууллага албан хэргээ ийнхүү кирилл болон үндэсний хос бичгээр хөтлөн явуулж эхэлсэнтэй холбогдуулан Монгол Улсын зөвлөх багш, Дундговь аймгийн хэлний бодлогын салбар зөвлөлийн гишүүн, Хүмүүнлэг сургуулийн багш Д.Отгонсүрэнгээс дараах тодруулгыг авлаа.

-Энэ оны нэгдүгээр сарын 1-нээс төрийн болон нутгийн өөрөө удирдах байгууллага албан хэргээ кирилл болон үндэсний хос бичгээр хөтлөн явуулж эхэллээ. Энэ тал дээр та өөрийн санал, бодлоо хуваалцана уу?

-Энэ үнэхээр зөв зүйтэй шийдвэр. Хэдийгээр хуулийн нэг заалт хэрэгжиж байгаа мэт боловч алс хэтийг харвал монгол үндэсний тусгаар тогтнолын баталгаа болж байна.

Дэлхий дээр 10 сая монголчууд монгол хэлээр ярьдаг гэдэг тоо аль хэдийнэ ард үлдсэн. Өнөөдөр 5 сая хүрэхтэй үгүйтэй хүн л монгол хэлээр ярьж байна. Монгол бичгээ хэрэглээнд оруулахгүйгээр хүн бүр хэрэглэж, сурч чадахгүй, ингэх нь аюултай гэж боддог.

Тиймээс монгол хүн бүрийн өмнө маш хариуцлагатай үе ирж байна. Үндэсний монгол бичгийг хүн бүр сурч, эзэмших түүхэн үе ирж байгаад монгол хэл, бичгийн багшийн хувьд баяртай байна.

-Та Дундговь аймгийн хэлний бодлогын салбар зөвлөлийн гишүүн хүний хувьд энэхүү шийдвэрийг хэрэгжүүлэхэд аймгийн төрийн байгууллага болон иргэд хэрхэн ажиллах вэ?  

-Мэдээж байгууллага бүр албан хэргээ хос бичгээр явуулахын тулд ажилтнуудаа илүү сайн сургаж, чадавхжуулах хэрэгтэй. Хэрэглэж байж, алдаа оноогоо засаж залруулж байж л бид хэрэглээ болгоно шүү дээ. Үүнд хяналт хэрэгтэй, олон алдаатай албан бичгийг хянаад үүрэг даалгавар өгөөд буцаагаад байвал сайжирна гэж бодож байна.

Иймд албан бичиг хянадаг зөвлөх ажиллуулах шаардлагатай юм. Аймгийн удирдлагууд өөрсдөө манлайлал үзүүлж, үндэсний бичгээ маш сайн сурах хэрэгтэй.

-Та үндэсний монгол бичгээ зааж сургах, түгээн дэлгэрүүлэхэд их хувь нэмэр оруулсан, цаашдаа ч оруулах байх гэж бодож байна. Энэ жил ямар ажлыг санаачлан хийхээр төлөвлөж байна вэ?

-Үндэсний хэмжээнд аймаг орон нутгийнхаа нэрийн өмнөөс олон жил олимпиад, уралдаанд оролцож, одоо ч аймгийн монгол хэлний олимпиадад шавийнхаа хамт түрүүлээд, улсын уралдааны бэлтгэлээ хийж байна.

Энэ жилдээ говийн бүсийн үндэсний бичгийн олимпиадыг орон нутагтаа зохион байгуулах бодолтой байна. Бид өнгөрсөн хавар Говьсүмбэр аймагт болсон говийн бүсийн монгол бичгийн олимпиадаас 6 алт, 5 мөнгө, 2 хүрэл медаль авч, үндэсний өв соёлоо түгээн дэлгэрүүлэгч аймаг болсон. Тиймээс энэ амжилтаа бататгаж, аймагтаа олимпиад зохион байгуулах, монгол бичгийн сургалт явуулах гэх мэт ажлыг төлөвлөөд байж байна.

-Танд баярлалаа.