Лавров: НҮБ-ын энхийг сахиулах ажиллагааны үндсэн зарчмыг хэвээр хадгалах хэрэгтэй
ДЭЛХИЙН МЭДЭЭ | УЛС ТӨРНЬЮ-ЙОРК. /TASS/. НҮБ-ын энхийг сахиулах ажиллагааны тогтолцоонд хэтэрхий их өөрчлөлт оруулсан хэдий ч үндсэн зарчмууд өөрчлөгдөөгүй хэвээр байгаа гэж ОХУ-ын Гадаад хэргийн сайд Сергей Лавров мэдэгдлээ.
"НҮБ-ын энхийг сахиулах ажиллагааг сайжруулах гэсэн Ерөнхий нарийн бичгийн даргын хүсэл эрмэлзлийг ОХУ дэмжиж байна. Зарим өөрчлөлт илүүц байгаа хэдий ч уг ажиллагааны үндсэн зарчмуудыг хэвээр хадгалах хэрэгтэй" гэж тэрбээр НҮБ-ын Ерөнхий Ассамблейн 73 дугаар чуулганы хүрээнд болсон “Энхийг сахиулах ажиллагаа” хуралдааны үеэр мэдэгджээ.
Үүний зэрэгцээ тэрбээр, хүч хэрэглэх боломжийг олгож байгаа эрх мэдэлд дэндүү их шунаж байгаа асуудлыг таслан зогсоох хэрэгтэй гэж анхааруулсан байна.
Түүний үзэж байгаагаар, энхийг сахиулах ажиллагааны хүрээн дэх эрх мэдэл тодорхой бөгөөд бодит байх ёстой ажээ.
Мөн тэрбээр, Хамтын аюулгүй байдлын гэрээний байгууллага энхийг сахиулах салбарт НҮБ-тай хамтран ажиллахад бэлэн байна гэж мэдэгджээ.
Хамтын аюулгүй байдлын гэрээг 1992 онд Ташкент хотод байгуулж, улмаар уг гэрээний хүрээнд 2002 он 10 дугаар сарын 7-нд Хамтын аюулгүй байдлын гэрээний байгууллагыг байгуулах хэлэлцээрийг байгуулжээ. Одоогийн байдлаар Армен, Беларусь, Казахстан, Киргизстан, ОХУ, Тажикистан зэрэг орон уг байгууллагад багтдаг ажээ. Тус байгууллагын хамтарсан хүчин цэргийн 22 мянган албан хаагчтай юм.
Д.Нямтулга