Манай боксчид Бишкек хотноо хүчээ сорьж байна
МОНГОЛЫН МЭДЭЭ | СПОРТУлаанбаатар /МОНЦАМЭ/. ЗХУ-ын баатар Д.Шопоковын дурсгалд зориулсан боксын олон улсын тэмцээнд оролцохоор манай улсын 8 тамирчин Киргиз улсын Бишкек хотыг зорилоо.
Энэ сарын 19-24-нд үргэлжлэх тус тэмцээн нь манай тамирчдын хувьд тив, Дэлхийн аварга шалгаруулах тэмцээний өмнөх томоохон сорилго тэмцээн болох юм. Манай багийн бүрэлдэхүүнд эрэгтэй боксчдоос Э.Баярсайхан 57 кг-д, Б.Мишээлт 63 кг-д, О.Бямба-Эрдэнэ 69 кг-д, Д.Давааням 81 кг-д тус тус өрсөлдөх бол эмэгтэй тамирчдаас 49 кг-д О.Жаргалан, 57 кг-д Т.Болортуул, 64 кг-д У.Шинэцэцэг, 75 кг-д М.Мягмаржаргал нар хүчээ сорихоор Бишкек хотноо очсон байна.
Эрэгтэй тамирчдын дасгалжуулагчаар ОУХМ Н.Баяраа, эмэгтэй багийн дасгалжуулагчаар спортын мастер М.Буянжаргал тус тус ажиллаж байгаа бөгөөд тус тэмцээнд О.Мандахбаяр шүүгчээр ажиллахаар очжээ.