Улаанбаатар /МОНЦАМЭ/. УИХ-ын дарга Г.Занданшатар Монгол Улсад албан ёсны айлчлал хийж буй БНСУ-ын Ерөнхий сайд Ли Наг Ёныг  хүлээн авч уулзлаа.

Уулзалтын эхэнд УИХ-ын дарга Г.Занданшатар 29 жилийн өмнөх гуравдугаар сарын 26-ны энэ өдөр Монгол Улс, БНСУ-ын хооронд дипломат харилцаа тогтоож байсныг дурдаад, зочдодоо ойн баярын мэнд дэвшүүллээ.

Эрхэмсэг ноён Ли Наг Ён, "Олон зууны түүхэн харилцаатай, хэл, соёл, ёс заншлын хувьд адил төстэй хоёр улс, ард түмний найрамдалт харилцааг улам бэхжүүлэн хөгжүүлэх нь бидний үүрэг. Хоёр улс Иж бүрэн түншлэлийн харилцааг хөгжүүлж байна. Үүнийг нэг шат ахиулан Стратегийн түншлэлийн түвшинд хүргэх нь чухал юм" гэв. Тэрбээр Засгийн газар хоорондын харилцаа, хамтын ажиллагаа мэдээж чухал. Үүний зэрэгцээ ард түмний төлөөлөл болсон Парламент хоорондын харилцааг бататган хөгжүүлэх нь түүнээс дутуугүй эрхэм зорилт юм хэмээн онцоллоо.

УИХ-ын дарга Г.Занданшатар улс төрийн итгэмжилсэн харилцааг гүнзгийрүүлж, эрх зүйн орчныг бэхжүүлэх зорилгоор хууль тогтоох дээд байгууллага хоорондын хамтын ажиллагааг идэвхжүүлэхийн төлөө байна. Энэ дашрамд БНСУ-ын Үндэсний Ассамблейн дарга Мүн Хи Санд миний мэндчилгээг уламжилж өгнө үү. Үндэсний Ассамблейн дарга энэ онд манай улсад айлчилна гэдэгт итгэж байна гэв. Тэрбээр “Цаашид хамтын ажиллагааны боломж нөөцийг бүрэн ашиглах, Монгол Улсад БНСУ-аас хэрэгжүүлэх төсөл, хөтөлбөрийг нэмэгдүүлэх, БНСУ-ын хөрөнгө оруулалт, шинэ техник, технологигийг Монголд нэвтрүүлэхийг бид эрмэлзэж байгаа. Энэ талаар эрх зүйн таатай орчныг бүрдүүлэхэд УИХ-ын зүгээс онцгой анхаарч ажиллах болно” гэв.

Түүнчлэн БНСУ-ын парламентын туршлагаас судалж, суралцахад анхаарч байгаагаа тэмдэглэв. Тухайлбал, БНСУ-ын “Иргэн та эрх баригч” гэсэн хөтөлбөр бидний сонирхлыг татаж байна. Аливаа асуудлаар 200 мянгаас дээш иргэний санал ирсэн тохиолдолд түүнийг парламент, Засгийн газрын түвшинд хэлэлцэж, ээдрээт хэргийн үнэн мөнийг тодруулдаг нь сайн туршлага гэж бодож байна. Мөн  БНСУ цөмийн реактор барих, эсэх асуудлыг иргэдээсээ асууж, Зөвлөлдөх санал асуулгаар шийдсэн байсан. Бид ч гэсэн Зөвлөлдөх санал асуулга явуулж, иргэдийн оролцоотойгоор шийдвэр гаргадаг байхыг эрмэлзэж байгаа хэмээн онцоллоо.

Уулзалтын үеэр БНСУ-аас олгож буй 500 сая ам.долларын хөнгөлөлттэй зээлээр хэрэгжүүлэх төслүүдийн талаар болон ирэх жил тохиох хоёр орны хооронд дипломат харилцаа тогтоосны 30 жилийн ойн хүрээнд хийх ажлын талаар санал солилцлоо. УИХ-ын дарга Г.Занданшатар эдгээр арга хэмжээг амжилттай хэрэгжүүлж, үр дүнд хүргэхэд УИХ-ын зүгээс бүх талын дэмжлэг үзүүлэх болно гэдгээ илэрхийллээ.

Мөн хоёр талын парламентын гишүүд парламентын бүлэг хоорондын хамтын ажиллагааг өргөжүүлэх талаар санал солилцлоо. УИХ-ын дарга Г.Занданшатар Монгол Улс Солонгосын хойгийг цөмийн зэвсгээс ангижруулах асуудлыг яриа хэлэлцээний замаар шийдвэрлэх ёстой гэсэн байр суурийг тууштай баримталж ирснээ дурдаад, “Улаанбаатарын яриа хэлэлцээ” санаачилгыг БНСУ-ын тал үргэлжлүүлэн дэмжинэ гэдэгт итгэлтэй байгаагаа илэрхийлэв.

Ноён Ли Наг Ён Солонгосын хойгт яриа хэлэлцээний зарчмаар энхтайван тогтоох Монголын талын санаачилгыг бүрэн дэмжиж байна гээд, БНСУ, БНАСАУ нэг зүгт харж, хамтдаа хөгжин дэвжих ёстой гэсэн байр суурийг бид баримталж байна гэлээ.

Уулзалтад УИХ-ын гишүүн, Монгол-БНСУ-ын парламентын бүлгийн дарга Б.Батзориг, УИХ-ын гишүүн, Монгол-БНАСАУ-ын парламентын бүлгийн дарга О.Баасанхүү, УИХ-ын гишүүн  Б.Ундармаа, Гадаад харилцааны дэд сайд Б.Батцэцэг, БНСУ-аас Монгол Улсад суугаа Онц бөгөөд Бүрэн эрхт Элчин сайд Жон Жэ Нам, БНСУ-ын Үндэсний Ассамблейн гишүүн, БНСУ-Монголын парламентын бүлгийн дэд дарга Ким Сон Тэ, Ю Сон Ёб, Үндэсний Ассамблейн гишүүн Пак Бён Сог, БНСУ-ын Гадаад хэргийн дэд сайд Жу Хён нар байлцав.