Төв болон говийн аймгуудын нутгаар цасан шуурга шуурна

Монголын мэдээ | Байгаль орчин
bolor@montsame.mn
2019-04-06 14:48:45

Улаанбаатар /МОНЦАМЭ/. Өнөө маргаашдаа баруун, төв болон говийн аймгуудын нутгаар цас хайлмагтаж орж, цасан шуурга шуурахыг Ус цаг уур, орчны шинжилгээний газар малчид, ард иргэдэд анхаарууллаа.


Ойрын өдрүүдийн цаг агаарын төлөв байдлыг танилцуулж байна. Энэ сарын 8-нд баруун аймгуудын нутгийн ихэнх, төв болон говийн аймгуудын нутгийн зарим газраар, 9-нд нутгийн зарим газраар, 11-нд баруун болон төвийн аймгуудын нутгийн хойд хэсгээр хур тунадас, нойтон цас орж, зөөлөн цасан шуурга шуурна. Салхи 8-нд зарим газраар, 9-нд нутгийн өмнөд хэсгээр, 11-нд нутгийн хойд хэсгээр секундэд 12-14 метр хүрч ширүүснэ. Дархадын хотгор, Хангай, Хөвсгөл, Хэнтэйн уулархаг нутаг, Завхан голын эх, Хүрэн бэлчир орчим, Идэр, Тэс, Хараа, Ерөө, Туул, Тэрэлж голын хөндийгөөр шөнөдөө 11-16 градус хүйтэн, өдөртөө 1 градус хүйтнээс 4 градус дулаан, Их нууруудын хотгор болон говийн бүс нутгийн өмнөд хэсгээр шөнөдөө 0-5 градус, өдөртөө 8-13 градус дулаан, бусад нутгаар шөнөдөө 6-11 градус хүйтэн, өдөртөө 1-6 градус дулаан байна. Хугацааны эцсээр ихэнх нутгаар дулаарна.

Холбоотой мэдээ