Улаанбаатар
А.Батцэцэг Ази тивийн шигшээд шалгарч, 3 бөх хүрлийн төлөө барилдана
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Чөлөөт бөхийн насанд хүрэгчдийн Азийн аварга шалгаруулах тэмцээний эмэгтэйчүүдийн 50, 55, 59, 68, 76 кг жингийн урьдчилсан болон хагас шигшээ барилдаан өнөөдөр боллоо.
Эмэгтэйчүүдийн 59 кг-д Азийн наадам болон Азийн АШТ-ий хүрэл, 23 хүртэлх насны ДАШТ-ий мөнгөн медальт, “Хасу-Мегастарс” клубийн тамирчин ОУХМ Алтанцэцэгийн Батцэцэг шигшээд буюу тивийн аваргын төлөө барилдахаар шалгарлаа.
Харин 55 кг-д “Нанжинь-2014” залуучуудын зуны олимпийн наадмын мөнгөн медальт, “Мөнхийн хүчтэн” клубийн тамирчин ОУХМ Болормаагийн Дөлгөөн, 68 кг-д “Лондон-2012” олимпийн наадмын хүрэл, ДАШТ-ий хошой алт, нэг мөнгөн медальт, хөдөлмөрийн баатар, гавьяат тамирчин Соронзонболдын Батцэцэг, 76 кг-д 23 хүртэлх насны Азийн АШТ-ий хүрэл медальт, “Хангай хайрхан” клубийн тамирчин спортын мастер Найгалсүрэнгийн Загардулам хүрэл медалийн төлөө барилдахаар болов.
Харин 50 кг-д 23 хүртэлх насны ДАШТ-ий хүрэл медальт, Азийн аварга “Хасу-Мегастарс” клубийн тамирчин ОУХМ Ц.Намуунцэцэг 1/4 шигшээд өмнө нь ОХУ-ын шигшээд багтаж, Европын наадмаас хүрэл медаль хүртсэн Казахстаны Валентина Исламовад 4:7-гоор ялагдаж тэмцээнээ дуусгав.
А.Батцэцэг алтан медалийн төлөөх барилдаанд Японы Юзүка Инагакитай хүч үзэх бол Б.Дөлгөөн Узбекистаны Шаходат Жуллибаеватай, С.Батцэцэцэг Энэтхэгийн Дивья Какрантай, Н.Загардулам Тайваний Чан Хуй Цитэй хүрэл медалийн төлөө барилдана. Тивийн АШТ-ий медалийн төлөөх барилдаан өнөөдөр 18 цагт эхэлнэ.
