О.Хангай "Ховд дэвжээ"-ний нээлтийн барилдаанд түрүүлэв

Монголын мэдээ | Спорт
ulzii@montsame.mn
2020-01-20 14:55:48

Улаанбаатар /МОНЦАМЭ/. Хан-Уул дүүргийн "Хан жаргалант" спорт цогцолборт "Ховд дэвжээ"-ний 2020 оны нээлтийн барилдаан болж улсын харцага Оргихын Хангай түрүүллээ.


Тус дэвжээ Ховд аймгийн Эрдэнэбүрэн сумын уугуул ард олныхоо дунд "Нарийн бэлхүүст" хэмээн алдаршсан Монгол Улсын начин Түвдэнжамбын Бат-Эрдэнэ агсны нэрэмжит юм.


Нээлтийн барилдаанд улс, аймаг, сумын цолтой болон залуу бөхчүүд оролцсон 56 бөх хүч сорьсноос Ховд аймгийн Буянт сумын харьяат Хан-уул дүүргийн ОБГ, "Зорчигч тээврийн нэгтгэл", "Од" групп, "Их Монгол сан", "Ховд" дэвжээний бөх Монгол Улсын харцага Оргихын Хангай түрүүлсэн бол Ховд аймгийн Эрдэнэбүрэн сумын харьяат "Ховд" дэвжээ, Хан-Уул дүүргийн Цагдаагийн хоёрдугаар хэлтсийн бөх Монгол Улсын өсөх идэр начин Цогтоогийн Лхагвасүрэн үзүүрлэв.


Их шөвөгт Ховд аймгийн Чандмань сумын харьяат, "Ховд" дэвжээний бөх, Монгол Улсын начин Чулуунбатын Цогбаяр, Ховд аймгийн Дарви сумын харьяат, "Алдар" спорт хороо, Зэвсэгт хүчний 032-р анги "Ховд" дэвжээ, "Сутай до" ХХК-ийн бөх, аймгийн арслан Балдиржамцын Тайван нар шалгарсан байна.

Холбоотой мэдээ