Их Британийн иргэдэд Хятадаас явахыг зөвлөжээ

ДЭЛХИЙН МЭДЭЭ | НИЙГЭМ
khulan@montsame.gov.mn
2020-02-05 09:55:42

ЛОНДОН. /BBC/. Шинэ төрлийн коронавирусээр халдварлах эрсдлийг бууруулах зорилгоор Хятадад байгаа Их Британийн бүх иргэнд тус улсаас явахыг зөвлөж байна гэж Их Британийн Гадаад хэргийн сайд Доминик Рааб мэдээлжээ.


Хятадад Их Британийн 30 мянга орчим иргэн байгаа гэж тус улсын Гадаад хэргийн яамны мэдэгдэлд тэмдэглэжээ. Мөн Хубэй мужид байгаа британичуудыг нүүлгэн шилжүүлэх ажиллагааг үргэлжлүүлнэ гэж Д.Рааб мэдэгдсэн байна.


Их Британи ирэх ням гарагт коронавирусний халдварын голомт болох Ухань хот руу дахин тусгай нислэг үйлдэж, иргэдээ нүүлгэн шилжүүлэхээр төлөвлөж байгаа ажээ. Уханиас бусад Хятадын хотоос арилжааны нислэгүүдийг хэвийн үйлдэж байгаа юм.


Өнгөрсөн ням гарагт Их Британийн иргэдийн сууж явсан нисэх онгоцонд байсан Бельги эмэгтэйн коронавирусний шинжилгээ эерэг гарсан бөгөөд түүнтэй хамт байсан хүмүүсийг 14 хоног тусгаарлажээ. Коронавирусний халдвар дэлхийн 20 гаруй улс оронд бүртгэгдсэнээс Их Британид 2 тохиолдол бүртгэгдсэн байна. 

Холбоотой мэдээ