Улаанбаатар
“Нэг гэрээс нэг хүн” зарчмыг баримталж, хүн хоорондын зай барихыг онцлон анхааруулав
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. Мэргэжлийн хяналтын байгууллагаас супермаркет, худалдааны төв, захуудад хийж буй тандалтаар аж ахуйн нэгж, байгууллагууд үйлчлүүлэгчдийн халууныг хэмжих, зай барих шаардлага тавьж, тэмдэг тэмдэглэгээ байршуулсан ч урсгалыг зөв зохион байгуулаагүй, иргэд үйлчлүүлэх явцад бөөгнөрөл үүсэхээс сэргийлсэн арга хэмжээ авахгүй байгааг МХЕГ-аас анхааруулж байна.
Тухайлбал, БЗД-ийн нутаг
дэвсгэрт байдаг И-Март худалдааны төвд иргэдийн халууныг хэмжиж нэвтрүүлэхдээ
дотор үүдэндээ бөөгнөрөл үүсгэсэн, хаалттай тасгуудад иргэд орсон, пицца,
хоолоор үйлчлэх хэсгүүдэд иргэд бөөгнөрсөн зэрэг зөрчил илэрч байна.
Мөн Алтжин Бөмбөгөр
худалдааны төвд орох гарах урсгалыг зохион байгуулсан ч иргэдэд шаардлага
тавиагүйгээс нэг хаалгаар орох гарах хөдөлгөөн хийгдэж байгаа, зөвхөн халууныг
хэмжиж QR код уншуулахгүй байх, иргэдийн бүртгэлийг хөтлөөгүй зөрчил илэрлээ.
Иргэд хүнсний худалдааны лангуугаар үйлчлүүлэхдээ бүх лангууг хэсэх, хүнсний
бүтээгдэхүүнийг барьж үзэх зэргээр эрсдэл үүсгэж байгаа юм.
Иймд аж ахуйн нэгж
байгууллагууд иргэдийн халууныг хэмжиж бүртгэл хөтлөх, QR код уншуулах,
худалдааны төв, тасаг, лангуугаар үйлчлүүлэх явцад бөөгнөрөл үүсгэхгүй байхаар
зохион байгуулах шаардлагатай.
Цаашид иргэд хүнсээ
цуглуулахдаа “Нэг гэрээс Нэг хүн” гэсэн зарчмыг баримтлан, худалдааны төвөөр үйлчлүүлэхдээ
хүн хоорондын зай барих, бие биедээ шаардлага тавих, төлбөрийг бэлэн мөнгөөр
биш карт, цахимаар төлж, коронавируст халдвараас урьдчилан сэргийлэх нэн
шаардлагатай байна.
