Улаанбаатар
Улсын төсвөөс хүлэмжийн тариалалтад 300 сая төгрөг зарцуулна
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Хаврын хүлэмжийн тариалалтыг дэмжиж, улсын төсвөөс 300 сая төгрөг зарцуулна.
Тодруулбал, энэ санхүүжилтээр 32 м2 талбай бүхий 83 иж бүрдэл нийлэг хальсан хүлэмж, 4 төрлийн хүлэмжийн таримлын үр 110 кг-ыг нийлүүлж, өрхийн тариалан эрхлэх иргэн, аж ахуйн нэгжид хөнгөлөлттэй нөхцөлөөр олгох юм. Ингэснээр хүлэмжийн тариалалтыг 75 га-гаар нэмэгдүүлэн төв суурин газрын иргэдийн хүнсний ногооны хангамжийг сайжруулах юм.
Мөн Бүгд Найрамдах Польш улсын 10,2 сая еврогийн
санхүүжилтээр “Хүнсний ногооны үйлдвэрлэлд нэмүү өртгийн сүлжээг хөгжүүлэх”
төслийг эхлүүлснийг ХХААХҮЯ-наас мэдээллээ.
Энэ хүрээнд 8,5 мянган тн багтаамжтай төмс, хүнсний ногооны
агуулах байгуулах, 50-80 морины хүчтэй 100 трактор, ногооны
үрлэгч, хураагч комбайн, копатель, хөрс боловсруулах техник,
ургамал хамгааллын бодис цацах тоног төхөөрөмж зэрэг нийт 600 гаруй төрлийн
техник тоног төхөөрөмж нийлүүлнэ.
Түүнчлэн, БНХАУ-ын хөнгөлттэй зээлээр хэрэгжүүлж буй “ХАА-н бүтээгдэхүүнийг дэмжих” төслийн хүрээнд үр тариа, тэжээлийн таримал тариалагчдад 54-125 га талбай услах, төмс, хүнсний ногооны тариалан эрхлэгч нарт 1 га талбайг услах хүчин чадалтай бага оврын 78 бороожуулагч, жимс, жимсгэний тариалан эрхлэгчдэд 1-3 га талбайг услах хүчин чадалтай дуслын усалгааны 90 ширхэг системийг 50 хувийн хөнгөлөлттэй үнээр, 6 жилийн хугацаатай, жилийн зургаан хувийн хүүтэй зээл олгож байгаа. Үүний дүнд усалгаатай талбайн хэмжээ 1500 га-гаар нэмэгдэх аж.
