Улаанбаатар
“Ахмад настны эрхийг дээдэлье” төсөл хэрэгжинэ
ОРОН НУТГИЙН МЭДЭЭ | ДАРХАН-УУЛ
Дархан-Уул /МОНЦАМЭ/. Аймгийн ИТХ-ын дэргэдэх Гэмт хэргээс урьдчилан сэргийлэх ажлыг зохицуулах салбар зөвлөл, “Ахмадын хөгжлийн төв” хамтран “Ахмад настны эрхийг дээдэлье” төслийг хэрэгжүүлэхээр болжээ. Уг төсөлд хамтран ажиллах төрийн байгууллагуудын төлөөллүүдтэй уулзалт хийж, төслийн танилцуулга хийлээ.
Төслийн нээлтэд аймгийн ИТХ-ын
Тэргүүлэгчдийн нарийн бичгийн дарга Ч.Энхбат оролцон, аймгийн ИТХ-ын дарга
С.Насанбатын мэндчилгээг уламжилж, тус төслийг амжилттай хэрэгжүүлэхэд бүх
талаар хамтран ажиллахаа илэрхийлсэн юм. 
Дархан-Уул аймгийн хэмжээнд 2020 оны статистик
мэдээгээр 13810 ахмад ажиллаж, амьдарч байна. Эдгээр ахмадуудын аливаа эрх
зөрчигдөх асуудал нэлээдгүй гардаг. Төр захиргааны байгууллагаас ахмад настанд
чиглэсэн ажил, арга хэмжээг зохион байгуулсаар байгаа боловч ахмад настануудад хууль
эрх зүйн анхан шатны мэдлэг дутмаг, эрхээ
хамгаалах чадамж хомс зэргээс болж төрийн болон
нийгмийн халамжийн үйлчилгээ авч чадахгүй байх, нийгмийн болон гэр бүлийн
хүчирхийлэлд өртөх, хохирогч болох нь түгээмэл байсаар байна. Иймд “Ахмадын
хөгжлийн төв”-ийн өдөр өнжүүлэх үйл ажиллагаа, эрүүл идэвхтэй амьдралын хэвшил
олгох, хэрэглээний чадамж суулгах сургалт зөвлөгөө зохион байгуулах аж. Түүнчлэн өдөр тутмын үйл ажиллагааны нөөц боломж дээр
тулгуурлан, ахмад настнуудад хамаарах хуулиуд, шинэчлэгдсэн болон өөрчлөлт
орсон хуулиудын нэмэлт мэдээллийг танилцуулах, өөрийн болон бусдын эрх
зөрчигдсөн тохиолдолд авах арга хэмжээ, нөхцөл боломжийг таниулах зэрэг нь
“Ахмад настны эрхийг дээдэлье” төслийн гол зорилго хэмээн Ахмадын хөгжлийн
төвийн дарга А.Янжмаа онцоллоо.
Үүний тулд тусгайлсан чиг үүрэг бүхий байгууллагуудын Ахмадын зөвлөлтэй хамтран ажиллаж, Зөвлөх багш нарыг урьж хичээл заалгах, 26 багт ажиллах сургагч багш нарыг бэлтгэн чадавхжуулах ажээ. Сургагч багш нарын сургалтыг цувралаар 4 сумын 26 багт зохион байгуулах бол “Ахмадын хөгжлийн төв”-д сургалтуудыг жилийн турш тогтмол зохион байгуулахаар уг төсөлд тусгажээ.
