Улаанбаатар
“Төрөөс мөнгөний бодлогын талаар 2025 онд баримтлах үндсэн чиглэл батлах тухай” тогтоолын төслийг өргөн мэдүүлэв
МОНГОЛЫН МЭДЭЭ | УЛС ТӨР
Улаанбаатар, 2024 оны есдүгээр сарын 27 /МОНЦАМЭ/. УИХ-ын дарга Д.Амарбаясгаланд Монголбанкны ерөнхийлөгч Б.Лхагвасүрэн “Төрөөс мөнгөний бодлогын талаар 2025 онд баримтлах үндсэн чиглэл батлах тухай" УИХ-ын тогтоолын төслийг өнөөдөр өргөн мэдүүллээ.
Ирэх онд хэрэгжүүлэх мөнгөний бодлого нь эдийн засаг, инфляцыг дунд хугацаанд тогтворжуулахад чиглэдэг. Цар тахлаас эхлэн геополитикийн хурцадмал байдлаар даамжирсан эдийн засгийн хүндрэлийг Монгол Улс амжилттай даван туулж, санхүүгийн зах зээл, эдийн засаг сэргээд байгаа бөгөөд энэхүү сэргэлтийг цаашид дунд хугацаанд тогтвортой хадгалахад чиглэсэн мөнгө, санхүүгийн бодлогыг хэрэгжүүлэхээр төсөлд тусгажээ.
Тодруулбал, эдийн засгийн өсөлтийн тогтвортой байдлыг дэмжих, иргэдийн бодит орлогыг хамгаалах зорилгоор инфляцыг дунд хугацаанд 5 хувьд (+/-2 нэгж хувийн интервалтай) тогтворжуулахад чиглэсэн мөнгөний бодлогыг зах зээлийн зарчимд тулгуурлан хэрэгжүүлнэ.
Мөн олон нийтийн санхүү, эдийн засгийн суурь
мэдлэгийг дээшлүүлэх стратегийг хэрэгжүүлж, Төв банкны бодлого, үйл ажиллагаа,
хэрэгжилтийг олон нийтэд нээлттэй, ил тод хүргэх зэрэг зорилтыг
тусгажээ хэмээн УИХ-ын Хэвлэл мэдээллийн газраас
мэдээллээ.
Холбоотой мэдээ
