Улаанбаатар
БУЛГАН: ИТХ-ын төлөөлөгчид хүний эрхийн мэдрэмжтэй ажиллахыг зорьж байна
ОРОН НУТГИЙН МЭДЭЭ | БУЛГАН
Булган, 2025 оны дөрөвдүгээр сарын 4 /МОНЦАМЭ/. Булган аймгийн аймаг, сумын ИТХ-ын төлөөлөгч нарын дунд тэдний Монгол Улсын Үндсэн хууль, олон улсын гэрээ, конвенцод заасан хүний эрх, эрх чөлөөний талаарх ойлголт мэдээллийг нэмэгдүүлэх, нутгийн өөрөө удирдах байгууллагын төлөөлөгчийн бүрэн эрхийн хугацаанд хийж хэрэгжүүлэх үйл ажиллагаагаа хүний эрхэд суурилсан хандлагаар явуулах, тулгамдаж буй зарим асуудлыг шийдвэрлэх арга замыг тодорхойлох зорилгоор “Үндсэн хууль ба Хүний эрх” илтгэлийн уралдааныг зохион байгуулсан байна.
Уралдаанд аймгийн ИТХ-ын төлөөлөгч Б.Юмжирмаагийн бүтээл шинэ, үндсэн болон бусад хуулийн хүний эрхийн онцлог зүйлийг тусган харуулснаараа нэгдүгээр байр, Хутаг-Өндөр сумын ИТХ-ын төлөөлөгч Ж.Амарсанаагийн бүтээл сум орон нутагт тулгарч буй хүний эрхийн асуудал түүний агуулгыг илэрхийлснээрээ хоёрдугаар байр, Рашаант сумын ИТХ-ын төлөөлөгч Ц.Дагвацэндийн бүтээл Үндсэн хууль дахь хүний эрхийг яагаад Үндсэн хуулийн цэц хянан шийдвэрлэдэггүй вэ гэдгийг илэрхийлснээрээ гуравдугаар байр, Хангал сумын ИТХ-ын төлөөлөгч О.Сувдмаагийн бүтээл хүний эрхийн олон талын тулгамдаж буй асуудлыг илэрхийлж тусгай байр эзэллээ.
Уралдаанд шалгарсан бүтээлийн эзэн, сум орон нутгийн удирдлагаар уламжлан шагналыг аймгийн ИТХ-ын дарга Ш.Насандулам гардууллаа.
