Улаанбаатар
ХБНГУ-ын Холбооны Ерөнхийлөгч Иоахим Гаук нутаг буцлаа
МОНГОЛЫН МЭДЭЭ
Монгол Улсын Ерөнхийлөгч Ц.Элбэгдоржийн урилгаар ХБНГУ-ын Холбооны Ерөнхийлөгч И.Гаукийн 10 дугаар сарын 14-16-нд Монгол Улсад хийсэн төрийн айлчлал өнөөдөр өндөрлөв.
Энэхүү айлчлал нь хоёр орны харилцааг бэхжүүлэх, ялангуяа эдийн засаг, батлан хамгаалах, соёл, боловсрол, шинжлэх ухааны салбарын хамтын ажиллагааг идэвхжүүлэхэд чухал ач холбогдолтой айлчлал боллоо.
Айлчлалын хүрээнд хийсэн албан ёсны уулзалт хэлэлцээний үеэр Холбооны Ерөнхийлөгч И.Гаук Монгол Улсын ардчиллыг өндрөөр үнэлдгээ илэрхийлээд Монголд ардчиллыг улам төгөлдөржүүлэхэд ХБНГУ-ын зүгээс үргэлжлүүлэн дэмжихээ мэдэгдсэн юм. Мөн хоёр орны харилцааг өргөжүүлэх, тэр дундаа хоёр орны Ерөнхийлөгч нарын ивээл дор явагддаг археологийн салбарын хамтын ажиллагааг цаашид дэмжихээ нотоллоо.
Тус айлчлалын үеэр Монгол, Германы шинжлэх ухааны салбарын хамтын ажиллагааг өргөжүүлэх тухай баримт бичгүүдэд хоёр тал гарын үсэг зурлаа. Мөн ашигт малтмал, аж үйлдвэрийн салбарт хамтран ажиллах монгол, германы хувийн хэвшлийнхэн хамтын ажиллагааны санамж бичиг байгуулсан юм.
ХБНГУ-ын Холбооны Ерөнхийлөгч И.Гаукийг Монгол Улсын Гадаад хэргийн сайд Л.Пүрэвсүрэн нарын албаны хүмүүс үдэж мордуулав.
