Охидын 16, 19 хүртэлх насны хөлбөмбөгчид бэлтгэлдээ гарчээ
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Монгол Улсын 16, 19 хүртэлх насны охидын шигшээ баг энэ онд болох Ази тивийн аварга шалгаруулах тэмцээн /АТАШТ/-ий урьдчилсан шатанд өрсөлдөнө.
Энэ цаг үед МХБХ-ны ногоон талбай цасанд хучигдсан ч Япон дасгалжуулагч Ики Ёоүжигээр удирдуулсан охидын шигшээ багийнхан бэлтгэл сургуулилалтаа тасралтгүй базаасаар байгаа юм.
Манай 16 хүртэлх насны охидын шигшээ баг өнгөрсөн жилийн тавдугаар сард Зүүн Азийн АШТ-д оролцож, “С” ангиллынхан дундаа хожил, тэнцээ байгуулан түүхэн дэх анхны албан ёсны оноогоо авч чадсан билээ. Харин энэ оны есдүгээр сард 16, 10 дугаар сард 19 хүртэлх насны шигшээ баг АТАШТ-ий урьдчилсан шатны тэмцээнд оролцоно.
Өнөөдрийн байдлаар 16 хүртэлх насны охидын шигшээ багийн бүрэлдэхүүн эцэслэн тодроогүй байгаа аж. Ирэх хоёрдугаар сарын 2-ноос эхлэн охидын шигшээ багийн хаалгачийн сонгон шалгаруулалтаар шигшээ багийн сонгон шалгаруулалтыг эхлүүлнэ.
Д.Өлзий