БАЯНХОНГОР: Энхийг сахиулах ажиллагааны цэргийн хүчний командлагчаар Хонгор нутгийн хүү үүрэг гүйцэтгэнэ
ОРОН НУТГИЙН МЭДЭЭ | БАЯНХОНГОР![](/files/659b8e6115286.jpeg)
Баянхонгор, 2024 оны нэгдүгээр сарын 8 /МОНЦАМЭ/. Дэлхийн зарим орны энхийг сахиулагчдыг удирдахаар болсон Бригадын генерал Б.Эрдэнэбатыг төрөлх нутагтаа ирэх үеэр нь аймгийн удирдлага хүлээн авч уулзав.
Монгол Улсын Зэвсэгт хүчин НҮБ-ын энхийг дэмжих ажиллагаанд бүх түвшинд нь ажиллаж, эх орон, Монгол Улсын нэр хүндийг олон улсад цуурайтуулсаар буй. Үүний нэг жишээ нь НҮБ-ын цахим хуудаснаа хэвлэгдсэн нь Монгол Улсын Зэвсэгт хүчний Агаарын цэргийн штабын дарга, бригадын генерал Б.Эрдэнэбатыг НҮБ-ын Кипр дэх энхийг сахиулах ажиллагааны цэргийн хүчний командлагчаар үүрэг гүйцэтгэхээр шалгаран томилогдсоныг НҮБ-ын Ерөнхий нарийн бичгийн дарга Антонио Гутерриш албан ёсоор зарласан байна. Ийнхүү Монгол Улсын Зэвсэгт хүчний генерал Кипр дэх НҮБ-ын энхийг сахиулах ажиллагаанд үүрэг гүйцэтгэж байгаа дэлхийн зарим орны цэргийн алба хаагчдыг нэгтгэн удирдахаар болсон юм.
Энэ нь Азийн орнуудын Зэвсэгт хүчний алба хаагчдаас анх удаа Монгол Улсын Зэвсэгт хүчний генерал энэхүү хариуцлагатай албанд томилогдож байгаагаараа онцлог болж байна.
Бригадын генерал Б.Эрдэнэбат 2020, 2021 онуудад БНӨСУ-д явагдаж буй энхийг сахиулах ажиллагааны Жуба секторын командлагчаар ажилласан туршлагатай бөгөөд Монгол Улсын Зэвсэгт хүчинд 1996 онд Цэргийн их сургуулийг Ерөнхий цэргийн команд, штабын офицер мэргэжлээр төгсснөөс хойш үүрэг гүйцэтгэж байгаа юм байна.
Бригадын генерал Д.Эрдэнэбат Баянхонгор аймгийн Эрдэнэцогт - Өлзийт сумын уугуул бөгөөд энхийг сахиулах ажиллагааны цэргийн хүчний командлагчаар үүрэг гүйцэтгэхээсээ өмнө төрөлх хонгор нутагтаа ирж, Номгон хайрхандаа мөргөн залбирч, хөгшид азай буурлууддаа золгожээ. Түүнийг нутагтаа ирэх үеэр Баянхонгор аймгийн ИТХ-ын дарга Э.Энхбат, АЗДТГ-ын Цэргийн штабын дарга, хуранаа Г.Нэмэхбаяр нар хүлээн авч уулзан, хүндэтгэл үзүүлэв.