АШУҮИС-ийн цогцолбор ашиглалтад оров

Монголын мэдээ | Эрүүл мэнд
bolor@montsame.mn
2018-12-10 15:49:09

Улаанбаатар /МОНЦАМЭ/. АШУҮИС-ийн цогцолбор хотхоны эхний ээлжийн А, Б блок буюу эмнэлэг, сургалтын төв нээлтээ хийв. Их сургуулиудыг цогцолбор хэлбэрээр хөгжүүлэх бодлого Монгол Улсын Засгийн газар мөрийн хөтөлбөртөө тусган ажиллаж буй. Тус ажлын эхлэл болгож АШУҮИС-ийн цогцолбор хотхоны бүтээн байгуулалтын ажлыг эхлүүлсэн юм.

Цогцолборын нээлтийн үеэр нийслэлийн ИТХ-ын дарга С.Амарсайхан, "Бид иргэн бүрийг нийслэлийн хөгжлийн бодлогынхоо гол цөм болгон харж, үүнд чиглэсэн бодлогыг хэрэгжүүлэхийг зорьж байна. Тиймээс авто зам тавьж, гүүр барихынхаа хажуугаар нийслэлийн иргэд, оршин суугчдын эрүүл мэндэд онцгойлон анхаарч, эрүүл, аюулгүй орчинд ажиллаж, амьдрах нөхцөл бүрдүүлэхээр шат дараатай арга хэмжээ хэрэгжүүлж байгаа. Үүний нэг жишээ бол нийслэлийн төсвийн хөрөнгө оруулалтаар барьж, ашиглалтад оруулсан Шүд, эрүү нүүрний төв юм. Иргэдийн эрүүл мэндийн энхийн манаанд зогсох эмч, эмнэлгийн мэргэжилтнүүдийг бэлтгэдэг АШУҮИС нь хүчин чадлаа нэмэгдүүлж, шинэ цогцолбортой болсноор суралцагчид сургалт, эрдэм шинжилгээний олон талт мэдлэгт суралцах боломж бүрдэнэ" гэв.


Шинээр ашиглалтад оруулж буй хичээлийн байранд 3000 гаруй оюутан суралцах боломжтой бөгөөд орчин үеийн төхөөрөмж, хэрэгслээр тоногложээ. Харин 62 ортой Монголын уламжлалт анагаах ухааны эмнэлэг жилд 110 гаруй хүн хүлээн авч, эмчилгээ үзүүлэх хүчин чадалтай. Мөн рашаан, шавар эмчилгээ, зүү төөнүүр, бариа заслын чиглэлээр тусламж, үйлчилгээ үзүүлэх анхны нэгдсэн эмнэлэг болж буйгаараа онцлогтой юм.

Нээлтийн ёслолд АШУҮИС-ийн захирал Ж.Цолмон, Эрүүл мэндийн сайд Д.Сарангэрэл тэргүүтэй албаны хүмүүс оролцсон юм.

Холбоотой мэдээ