Улаанбаатар /МОНЦАМЭ/. Татварын ерөнхий газраас мэдээлснээр 2018 оны 12 дугаар сарын 15-ны өдрөөс өмнө НӨАТ-ын буцаан олголтын баримтын бүртгэлийн мэдээллээ залруулж, хүсэлтээ гарган баталгаажуулахыг Татварын байгууллагаас анхааруулж байна.

Учир нь өнгөрсөн 2017 онд НӨАТ-ын буцаан олголтын нийт 272.697 баримт хэвлэж, иргэд 169.370 баримтыг Е-баримтын системд бүртгүүлэн баталгаажуулснаас 6117 иргэний мэдээлэл зөрүүтэй байсан тул буцаасан байна. Тиймээс баталгаажаагүй буюу баталгаажуулаагүй тохиолдолд “Нэмэгдсэн өртгийн албан татвар төлөгчийн худалдан авалтад төлсөн нэмэгдсэн өртгийн албан татварыг буцаан олгох журам”-ын 6 дугаар зүйлийн 6.14-т заасны дагуу урамшууллыг цуцалж, санхүүжилтийг буцаах болно. Санхүүжилт буцсан тохиолдолд урамшуулал олгох тухайн оны НӨАТ-ын буцаан олголтоо аваагүй бол баримтаа баталгаажуулахыг анхааруулж байна.  

НӨАТ-ын тухай хууль, “Нэмэгдсэн өртгийн албан татвар төлөгчийн худалдан авалтад төлсөн НӨАТ-ыг буцаан олгох журам”-ын дагуу жил бүрийн нэгдүгээр улиралд өмнөх онд бүртгүүлсэн е-баримтын 2 хувийн буцаан олголтыг иргэдийн дансанд шилжүүлдэг билээ. Учир нь дээр дурдснаар өнгөрсөн онд 6117 иргэний мэдээлэл зөрүүтэй тул нэмэгдсэн өртгийн албан татварын урамшуулал Монгол банкнаас гүйлгээ хийх явцад буцаагдсан байна.

Мөн НӨАТУС буюу сугалаанд оролцож, хонжвор таарсан иргэдийн 2143 нь мэдээллээ баталгаажуулаагүй, эсхүл данс буруу, эзэмшигчийн нэр зөрсөн зэрэг иргэдээс өөрсдөөс нь шалтгаалсан хүчин зүйлийн улмаас урамшууллаа авч чадахгүйд хүрчээ. Иймд дээрх иргэдийн е-баримт бүртгүүлдэг апп руу “Таны 2017 онд авах нэмэгдсэн өртгийн албан татварын урамшуулал Монголбанкнаас гүйлгээ хийх явцад мэдээлэл зөрүүтэйн улмаас буцаагдсан байна. Иймд боломжгүйг анхаарна уу” гэсэн санамжийг илгээж байна.

2017 оны НӨАТ-ын буцаан олголтоо аваагүй бол баримтаа баталгаажуулна уу?

Иргэн та 2017 онд бүртгүүлсэн баримтын буцаан олголтыг аваагүй, эсвэл 2018 онд бүртгүүлсэн баримтын сугалааны хонжвор дансанд тань орж ирээгүй бол 2018 оны 12 дугаар сарын 15-ны өдрөөс өмнө харьяа татварын албанд очиж, мэдээллээ шинэчлүүлэх, е-баримтын системд нэвтэрч мэдээллээ баталгаажуулах эс бөгөөс 1800-1288 дугаарт залгаж, бүртгэлийн мэдээллээ залруулахыг сануулж байна.

Буцаан олголтын урамшуулал, сугалааны хонжвор авах иргэд цахим төлбөрийн www.ebarimt.mn системд хувийн мэдээллээ буруу оруулсан болон 131313 тусгай дугаараар мессеж илгээж, төлбөрийн баримт бүртгүүлдэг иргэд 2018 оны 12 дугаар сарын 15-ны өдрөөс өмнө дараах тохиргоог хийнэ үү гэжээ. Үүнд. EBARIMT.MN-ХУВЬ ХҮН/ НЭВТРЭХ ДАНС-ТОХИРУУЛАХ  гэсэн дарааллаар орж, доорх байдлаар мэдээллээ үнэн зөв болгоно уу. Үүнд:

• Овог, нэр кирилээр байх
• Регистрийн дугаарын формат зөв эсэх
• Банкны нэр, хамтран эзэмшигчгүй зөвхөн өөрийн дансны дугаараа зөв оруулсан эсэхийг шалгах хэрэгтэй хэмээн Татварын ерөнхий газраас мэдээлж байна.