Улаанбаатар
Бямба, ням гарагт дугаарын хязгаарлалт үйлчилнэ
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Засгийн газрын өнөөдрийн хуралдаанаар шинийн дөрөвний ажлын өдрийг ирэх бямба гарагт /2019.02.02/ шилжүүлсэн. Үүнтэй холбогдуулан улсын дугаарын тэгш, сондгой тоогоор төгссөнөөс хамаарч замын хөдөлгөөнд оролцох шийдвэр өөрчлөгдөхгүйг Тээврийн цагдаагийн албанаас мэдээлэв.
Тодруулбал, ирэх бямба гарагт тэгш, ням гарагт сондгой тоогоор төгссөн улсын дугаартай тээврийн хэрэгсэл хөдөлгөөнд оролцоно. Хязгаарлалттай тээврийн хэрэгсэл хориглосон авто замаар 08.00-20.00 цагт хөдөлгөөнд оролцохгүй байхыг тус албанаас анхааруулав. Харин шинийн дөрвөн буюу ирэх сарын 8-ны баасан гарагт дугаарын хязгаарлалт үйлчлэхгүй юм.
Мөн Чингэлтэй дүүргийн нутаг дэвсгэрт ирэх бямба, ням гарагт “Дэнжийн 1000” авто замын хөдөлгөөнийг “Хүчит шонхор” худалдааны төвийн зүүн урд уулзвараас хойш, үерийн далангийн уулзвар хүртэл урдаас хойш чиглэлд далангаас зүүн тийш Чингэлтэйн өргөн чөлөөтэй нийлэх уулзвар хүртэлх авто замын хөдөлгөөний баруунаас зүүн чиглэлд 08:00-17:00 цагийн хооронд тус тус нэг чигийн хөдөлгөөнд оруулах арга хэмжээг авах юм байна.
