Нүдний болор солиулах хагалгаанд 56 иргэн орлоо
ОРОН НУТГИЙН МЭДЭЭ | ДОРНОДДорнод /МОНЦАМЭ/ Дорнод аймгийн Улаан загалмайн хороо ӨМӨЗО-ы Хөлөнбуйр аймгийн Улаан загалмайн хороотой хамтран нүдний болор суулгах “Гэгээн зам” төслийг хэрэгжүүлж байна. Төслийн хүрээнд Дорнод, Хэнтий, Сэлэнгэ, Дархан-Уул аймгийн 56 иргэн нүдний болор суулгах хагалгаанд амжилттай ороод ирлээ.
Хагалгаа ӨМӨЗО-ы Хөлөнбуйр аймгийн Шинэ барга баруун хошууны Алтан-Эмээл хотод 3 өдрийн турш үргэлжилсэн юм.
Харааны бэрхшээлтэй олон арван иргэнд ертөнцийг харах
гэрэл гэгээ бэлэглэж байгаа энэхүү хүмүүнлэгийн үйлс нь 5 жилийн хугацаанд
үргэлжлэх юм. Таван жилийн хугацаанд нүдний болорын цайралттай 500 өвчтөнд үнэ
төлбөргүй мэс засал хийхээр төлөвлөжээ. Нүдний болор суулгах хагалгаа 15-20
минутын турш үргэлжилж, өвчтөн нэг өдөр
гам барин хэвтрийн дэглэм сахиснаар дараагийн үзлэгт орж хараа дээшилсэн эсэхээ
шалгуулж эмчилгээ дуусдаг байна.