Академичдын хувийн хөмрөг үүсгэнэ

Монголын мэдээ | Нийгэм
bolor@montsame.mn
2019-07-10 10:00:05

Улаанбаатар /МОНЦАМЭ/. Үндэсний төв архивт академичдын хувийн хөмрөг үүсэх эхлэл тавилаа. 


Тодруулбал, Үндэсний төв архивын сан хөмрөгт академичдын хувийн хөмрөгийг үүсгэж, архивын сан хөмрөгийг баяжуулах, эрдэм шинжилгээ, судалгааны хамтарсан бүтээл бэлтгэх, хэвлэн нийтлүүлэх зорилгоор Архивын ерөнхий газар, ШУА-тай өнгөрсөн тавдугаар сард хамтран ажиллах санамж бичиг байгуулсан билээ. Санамж бичгийн хүрээнд өнөөдөр ШУА-ийн Тэргүүн дэд Ерөнхийлөгч Г.Чулуунбаатар, академич П.Нямдаваа, Г.Бямбаа, Б.Жадамба, Т.Дорж, Г.Чулуунбаатар, Н.Бэгз, Б.Бурмаажав, С.Чулуун нарыг Архивын Ерөнхий газрын дарга С.Энхбаатар хүлээн авч уулзлаа. Тэд энэ үеэр  Архивын ерөнхий газрын үйл ажиллагаатай танилцаж, тус тусын хувийн хөмрөгөө бүрдүүлэх зааварчилгаа авсан юм.

Уулзалтын үеэр академич С.Чулуун “Нэг академичийн ард нэг шинжлэх ухааны түүх байдаг. Тэр шинжлэх ухааны түүхийг хадгалж судалгаа шинжилгээний өв болгож үлдээх нь бол маш чухал” хэмээв. Мөн тэрбээр, “Гадаадын улс орнуудын шинжлэх ухааны байгууллагуудад  академичдын асар том сан хөмрөг байдаг. Академичдынхаа өвийг нэг дор төвлөрүүлж, тэр нь тухайн улсын шинжлэх ухааны судалгаа шинжилгээний өв болж үлддэг. Гэтэл манайд өнгөрсөн болоод одоо  үеийн академичдын материалыг олж үзэх боломж хомс, бараг  олдохгүй. Оросын ШУА-ийн Петрбургийн салбарт  л гэхэд  бүх академичид өөрийн өв, хөмрөг үүсгэдэг уламжлалтай. Академичид нь ч  энэ үүргээ маш сайн ухамсарлаж материалаа бүрдүүлж өгдөг. Энэ утгаараа бид Архивын ерөнхий газарт  санал тавьж монголын оюуны уурхай болсон нэртэй эрдэмтдийнхээ  оюуны  их өвийг хадгалж, судалгаа шинжилгээний эргэлтэд оруулах,  энэ өвийг  хойч үедээ үлдээхийг зорьсон.  Академич нар бүх салбарын эрдэм шинжилгээний төлөөлөл, Монголын шинжлэх ухааны түүхийг өвлөгчид. Б.Ренчин, Ц.Дамдинсүрэн гээд аугаа академичдын зохиол,  бүтээлийг одоо бид бахархан үзэж, судалж суралцаж байна” гэсэн юм.

Цаашид Монголын өв соёл түүхэн баримтыг Монгол төдийгүй, олон улсын түвшинд хамтран судлах, илрүүлэх талаар санамж бичгийн хүрээнд ажиллах боллоо.

Холбоотой мэдээ