Улстөрийн нам байгуулах эрхийг хязгаарлаж байна гэв
МОНГОЛЫН МЭДЭЭ | УЛС ТӨРУлаанбаатар /МОНЦАМЭ/. Үндсэн хуулийн нэмэлт, өөрчлөлтийн төсөлд улстөрийн
намуудтай холбоотой зарим заалтыг тусгах шаардлагатай байгаа тухай авлигын
эсрэг “Шилэн нам” түншлэлээс өнөөдөр хэвлэлийн бага хурал хийхдээ мэдэгдлээ.
Улстөр судлаач
Э.Гэрэлт-Од энэ талаар хэлэхдээ, “Үндсэн хуулийн нэмэлт өөрчлөлтийн 2-р
хэлэлцүүлгийн үеэр хуулийн төслийн 19.2 дахь хэсэгт “Намыг Монгол Улсын
сонгуулийн эрх бүхий иргэдийн 1 хувиас доошгүй тооны иргэд эвлэлдэн нэгдэж
байгуулна” гэсэн саналыг оруулж хэлэлцэн дэмжээд буйг хэлээд, “Энэ нь Үндсэн
хуулийн 16-р зүйлийн 10 дахь хэсэгт заасан иргэдийн эвлэлдэн нэгдэх эрх, эрх
чөлөөг хамгаалах бус хязгаарлаж байна” гэлээ.
Манай улсад улстөрийн 35 нам Улсын дээд шүүхэд бүртгэлтэй байгаагаас 29 нь нийт сонгогчдын 1 хувь хүрэхгүй тооны гишүүнчлэлтэй байна. Харин 6 нам 1-ээс дээш хувийн гишүүнчлэлтэй байгаа аж.
Авлигын эсрэг “Шилэн нам”
түншлэлд “Захиргааны шинэ санаачилга”, “Хүртээмжтэй хөгжил хүрээлэн”, “Транспэрэнс
интернэшнл Монгол”, “Либерал эмэгтэйчүүдийн оюуны сан” зэрэг ТББ-ууд, улстөр
судлаач Э.Гэрэлт-Од, хуульч В.Удвал, судлаач Ч.Сосормаа нар нэгдэн үүсгэн
байгуулжээ.
Б.Болд