Австралийн нийслэл хотын бүсэд тогтоосон онцгой байдлыг цуцалжээ

Дэлхийд | Байгаль орчин
Jargal.d@montsame.mn
2020-02-03 11:57:49

СИДНЕЙ. /TASS/. Ойн түймрийн эрч буурсны дараа Австралийн нийслэл хотын бүсэд нэгдүгээр сарын 31-нд тогтоосон онцгой байдлыг цуцалсан байна.


“The Canberra Times” сонинд мэдээлснээр, ням гарагийн орой Австралийн нийслэл Канберра хотоос өмнө зүгт гарсан түймрийн эрч эрс буурч, талбай нь багассантай холбоотойгоор хотын эрх баригчид ийм шийдвэр гаргажээ. “Нийслэл хотын бүс нутгийн хэмжээнд галын байдал сайжирсан ч хөдөө, алслагдсан бүс нутагт тодорхой эрсдэл байсаар байна” гэж онцгой байдлын газрын ахлах офицер Жоржина Уилан мэдээлсэн байна. Түүний хэлснээр, гал сөнөөгчид Австралийн нийслэл хотын бүсийн баруун өмнөд хэсэгт оршдог Намажи үндэсний цэцэрлэгт хүрээлэн болон Канберро хотоос өмнөд зүгт 30 км-ын зайтай оршдог Оррорал Вэлли дархан цаазат газарт дэгдсэн түймрийг цурманд оруулж чадсан бөгөөд нийслэл хотын захын хороололд түймрийн аюул нүүрлэхээ больсон байна.


Онцгой байдлыг цуцалсан хэдий ч түймрийн аюул дахин нүүрлэх эрсдэлтэй байгааг бүс нутгийн эрх баригчид мөн мэдэгджээ.


Холбоотой мэдээ