Монгол хүний дундаж наслалт 10 жилийн дараа 74.5 болно

Монголын мэдээ | Эрүүл мэнд
bolor@montsame.mn
2020-09-22 16:59:05

Улаанбаатар /МОНЦАМЭ/. ЭМЯ лавлагаа шатлалын болон төрөлжсөн мэргэжлийн эмнэлгүүдийн хөгжлийн хөтөлбөр, тулгамдаж буй асуудлуудыг хэлэлцэх хамтарсан цуврал уулзалт зохион байгуулж буй. Өнөөдрийн хамтарсан уулзалтаар “Геронтологийн үндэсний төвийн хөгжлийн хөтөлбөр 2021-2024”-ийг тус төвийн ерөнхий захирал Р.Хишигжаргал танилцууллаа.

 

Үндэсний статистикийн хорооноос 2019 онд хийсэн судалгаагаар, монгол хүний дундаж наслалт 70.1 байна. 2030 он гэхэд энэ тоо 74.5, 2045 онд 81.4-д хүрч, хүн амын 13.4 хувь буюу 671 мянга гаруй иргэн ахмад настны ангилалд орох судалгаа гарчээ. Тиймээс геронтологийн чиглэлийн тусламж үйлчилгээний хүртээмжийг нэмэгдүүлэх хэрэгцээ шаардлага зүй ёсоор тулгарч байна.

Одоогоор манай улсын хэмжээнд 60 ба түүнээс дээш настай 5000 хүн тутамд нэг эмч ногдож байна. Аймаг, дүүргийн ЭМТ-ийн 30 хувьд л настны кабинет ажиллаж байгаа нь хангалттай үзүүлэлт биш юм. Тиймээс геронтологи, гериатрын мэргэжлийн эмнэлгийн тусламж үйлчилгээг өргөтгөх, энэ чиглэлийн эрдэм шинжилгээ, судалгааг хөгжүүлэх, настан судлал, настны сувилахуйн чиглэлээр төрөлжсөн мэргэжлийн сургалтыг тогтмол хийх тогтолцоог бүрдүүлэх зайлшгүй шаардлагатай байна. Цаашилбал, настны эрүүл мэндийн цогц (бие махбод, сэтгэц, нийгмийн) үнэлгээг хийж, тусламж үйлчилгээг төлөвлөн хэрэгжүүлж, хянах, эргэх холбоог бий болгох хэрэгтэй. Ингэснээр настны дотоод чадамж, чадвар, амьдралын чанарыг дээшлүүлж, эрүүл урт наслуулах үндэс болох юм.

Геронтологийн үндэсний төвийн шинэ барилгын шав 2011 онд тавигдсан боловч өдий хүртэл баригдаагүй. Байгууллагын үйл ажиллагааны цар хүрээ өндөр, үндэсний лавлагаа түвшинд хэрэгждэг хэдий ч хүний нөөц, орон тоо цөөн. Хүн амын хэрэгцээнд нийцүүлэн тусламж үйлчилгээний төрөл зүйлийг нэмэх шаардлагатай боловч байрны асуудлаас шалтгаалан боломжгүй байгаа зэрэг тулгамдсан асуудал аж.


Эрүүл мэндийн сайд Т.Мөнхсайхан, Манай улсад одоогоор 227 мянга гаруй өндөр настан байна. Тэдний өвчлөл ямар хэмжээнд байна, эмчилгээнд хэдий хэмжээний мөнгө зарцуулж байна гэдэгт бид тоон судалгаа хийх хэрэгтэй. Настнуудыг өвчлөлөөс урьдчилан сэргийлж, хэрхэн эрүүл урт наслуулах вэ гэдэгт нэлээд анхаарлаа хандуулах шаардлагатай. Геронтологийн үндэсний төвийн шинэ барилгыг барьснаар настнуудын эрүүл мэндийн асуудал шийдэгдэхгүй. Хамгийн гол нь Геронтологийн үндэсний төв өндөр настнуудыг хэрхэн зөв амьдралын хэв маягт сургаж, эрүүл урт наслах амьдралын зөв дадлыг хэвшүүлэх вэ гэдэг талаар улсын хэмжээнд, өргөн далайцтай ажиллах хэрэгтэй. Үүнийг бодлогоор дэмжиж, санхүүжилтийн тогтолцоог ЭМД-тай уялдуулж, нэмэгдүүлэх шаардлагатай байна. Урьдчилан сэргийлэх ажлыг үр дүнтэй хэрэгжүүлж чадвал үүнд зарцуулах мөнгө нь өвчилсний дараа эмчилгээ, сувилгаанд шаардагдах зардлаас хэд дахин бага гарна гэдгийг онцолсон юм.



Холбоотой мэдээ