Улаанбаатар
ДЭМБ: Гарын эрүүл ахуйг сайжруулахад хөрөнгө оруулах нь эдийн засгийн асар их ашиг тустай
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. Гарын эрүүл ахуйн дэлхийн өдөр өнөөдөр тохиож байна.
Эл өдрийг
2009 оноос “Цэвэр гар амь насыг аварна” уриатай жил бүрийн 5 дугаар сарын 5-нд
гарын эрүүл ахуйг сайжруулахын ач холбогдлыг сурталчлах зорилгоор тэмдэглэж
ирсэн.
ДЭМБ-аас 2021 онд уг өдрийг тохиолдуулан эрүүл мэндийн
байгууллагууд, эрүүл мэндийн ажилтнуудад тусламж үйлчилгээ үзүүлж байгаа үед
гарын эрүүл ахуйг чанд сахихыг уриалж байна.
Эрүүл мэндийн тусламж үйлчилгээ үзүүлэх явцад халдварын тархалтаас
урьдчилан сэргийлэхийн тулд гарын эрүүл ахуйг шаардлагатай үед (5 тохиолдолд), байгаа
боломжоо ашиглан зөв техникээр хамгийн үр дүнтэй аргаар сахих хэрэгтэй. Үүнийг
ДЭМБ-ын гарын эрүүл ахуйг сайжруулах олон талт стратегийг ашиглан хэрэгжүүлж
болно.
Гарын эрүүл ахуйг зөв сахих нь халдварын тархалтыг зогсоох
хамгийн үр дүнтэй арга хэмжээ болохыг шинжлэх ухаан баталсаар байна. Гарын
эрүүл ахуйг зөв сахих нь эрүүл мэндийн тусламж үйлчилгээ үзүүлэх явцад гарч
болзошгүй халдвар, түүний дотор эрүүл мэндийн ажилтан халдвар авахаас 50 хувь
хүртэл сэргийлнэ.
ДЭМБ-ын гарын эрүүл ахуйг сайжруулах олон талт стратегийг
хэрэгжүүлснээр гарын эрүүл ахуйн гол үзүүлэлтүүд мэдэгдэхүйц сайжирч, эрүүл
мэндийн тусламж үйлчилгээтэй холбоотой халдвар болон нянгийн тэсвэржилт буурч,
халдварын дэгдэлтийг зогсооход ихээхэн хувь нэмэр оруулдгийг баталжээ.
Гарын эрүүл ахуйг зохих ёсоор сахих нь эрүүл мэндийн ажилтнуудын
дунд “COVID-19”-ийг үүсгэгч SARS-CoV-2 вирусний халдварын эрсдэлийг бууруулна.
Гарын эрүүл ахуйг сайжруулахад хөрөнгө оруулах нь эдийн засгийн
ашиг тустай. Хийсэн хөрөнгө оруулалтаасаа 16 дахин их хэмжээгээр эдийн засгийн
хэмнэлт гаргах боломжтой.
Гарын эрүүл ахуйг сахих дүрэм, зааврыг мөрдөж байгаа байдлыг
эрүүл мэндийн байгууллагуудын халдварын сэргийлэлт, хяналтын гүйцэтгэл, түүний
хяналт, үйлчлүүлэгчийн аюулгүй байдал, эрүүл мэндийн тусламж үйлчилгээний
чанарын үндсэн үзүүлэлтийн нэг болгохыг зөвлөж байна.
