Улаанбаатар
Монголын баг тамирчид Токиог зорих 30 эрхтэй боллоо
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Токио хотноо энэ оны 7 дугаар сарын 23-наас 8 дугаар сарын 8-ны өдрүүдэд зуны XXXII олимпын наадам, 8 дугаар сарын 24-нөөс 9 дүгээр сарын 5-ны өдрүүдэд зуны XVI паралимпын наадам болно.
Монгол Улсын үндэсний шигшээ багийн тамирчид 5 дугаар сарын 12-ны байдлаар олимпын 30 эрхийн болзол хангаад байна. Хамгийн сүүлд эрх авсан тамирчдыг онцлон дурдвал: энэ сарын 7-нд Болгарын Софи хотноо болсон бөхийн төрлүүдийн олимпын эрх олгох дэлхийн тэмцээнээс гавьяат тамирчин Э.Бэхбаяр чөлөөт бөхөөр эрхийн болзол хангасан бол эмэгтэйчүүдийн 62 кг-д ОУХМ Х.Болортуяа олимпын эрхийн болзол хангаж, чөлөөтийн эмэгтэй тамирчид бүтэн багаараа Токиог зорихоор болсон.
“Токио-2020” паралимпын
тухайд хамгийн сүүлд буюу энэ оны 5 дугаар сарын 6-ны өдөр олон улсын пара
хөнгөн атлетикийн холбооноос манай улсын нэг эрэгтэй, нэг эмэгтэй тамирчин “Токио-2020”
паралимпын наадамд оролцох болзол хангасныг албан ёсоор мэдэгдсэнээр нийтдээ 7
эрхтэй боллоо. Тодруулбал, пара хөнгөн атлетикийн тамирчин Ц.Энхманлай,
Д.Саруултөгс нар Токиог зорино.
Олимп, паралимпын эрх
олгох болон эрхийн оноогоо цуглуулах тэмцээнүүд энэ өдрүүдэд үргэлжилсээр байгаа
юм.
