Улаанбаатар
ОХУ-ын эдийн засгийн онцгой бүсэд Монголын тээвэр-логистикийн газрыг нээнэ
МОНГОЛЫН МЭДЭЭ | ЭДИЙН ЗАСАГ
Улаанбаатар /МОНЦАМЭ/. ОХУ-ын Приморийн хязгаарын
“Надеждинский” эдийн засгийн онцгой бүсэд
Монголын тээвэр-логистикийн газар нээгдэх гэж буйг Монгол Улс дахь ОХУ-ын Худалдааны төлөөлөгч М.Васильев МҮХАҮТ-ын удирдлагатай уулзах үеэр мэдэгдлээ. Тэрбээр, цаашид
“Монголд үйлдвэрлэв” худалдааны төв байгуулах хэтийн төлөв харагдаж байна хэмээн
онцолсон юм.
МҮХАҮТ-ын ерөнхийлөгч О.Амартүвшин Монгол Улс дахь ОХУ-ын худалдааны төлөөлөгч М.Васильев, тус улсын “Феско” группийн харилцаа холбооны газрын дарга Н.Томилин нарыг хүлээн авч уулзаж, санал солилцлоо. Уулзалтын үеэр 100 гаруй жилийн түүхтэй, ОХУ-ын тэргүүлэх тээвэр-логистикийн группийн төлөөлөгчид үйл ажиллагаагаа танилцуулж, тээвэрлэлтийн цар хүрээгээ тэлж Монголын зах зээлд нэвтрэхэд дэмжлэг үзүүлэхийг хүсэв.
Мөн ОХУ-ын Москва хотноо болох Монгол Улс, ОХУ-ын Засгийн Газар хоорондын комиссын 23 дугаар хуралдааны протоколд хоёр улсын худалдаа эдийн засаг, бизнесийн харилцааг хөгжүүлэхэд МҮХАҮТ-ын оролцоо чухал болохыг онцлон тэмдэглэв.
Түүнчлэн энэ оны 10 дугаар сарын 20-22 нд Москва хотноо зохион байгуулагдах “Орост үйлдвэрлэв-2022” бизнес форумд МҮХАҮТ-ын удирдлагууд, монголын бизнес төлөөллийг оролцохыг урилаа.
