Улаанбаатар
ДУНДГОВЬ: Иргэдэд эрүүл мэндийн боловсрол олгож, үйлчилгээ үзүүллээ
ОРОН НУТГИЙН МЭДЭЭ | ДУНДГОВЬ
Мандалговь, 2025 оны дөрөвдүгээр сарын 4 /МОНЦАМЭ/. Дундговь аймгийн Уламжлалт анагаах ухааны нэгдсэн эмнэлгээс
өдөрлөг зохион байгуулж, иргэдэд эрүүл мэндийн боловсрол олгож, үйлчилгээ
үзүүлж, зөвлөгөө өглөө.
“Эрүүл монгол хүн” үндэсний хөдөлгөөн “Эрүүл зөв
хооллолт”, “Эрүүл зан үйл”, “Эрүүл мэндийн боловсрол”, “Нийтийн биеийн тамир”
гэсэн үндсэн дөрвөн бүрэлдэхүүнтэй ба иргэдийг өвчилсөн хойно нь эмчлэх бус,
өвчлөхөөс урьдчилан сэргийлэх, өвчлөлийн шалтгааныг бий болгож буй хүчин
зүйлсийг арилгах, эрүүл орчин, нөхцөл бүрдүүлэх, эрүүл хүнсээр хангах, зөв
дасгал хөдөлгөөн, зохистой амьдралын хэвшилтэй болгох, эрүүл мэндийн боловсрол
олгоход чиглэж байгаа. Тиймээс Уламжлалт анагаах ухааны нэгдсэн эмнэлгээс
зохион байгуулсан тус өдөрлөг иргэдэд эрүүл зөв хооллолт, эрүүл мэндийн
боловсрол олгох зорилготой юм.
Өдөрлөгийн үеэр Монголын нэгдмэл анагаах ухааны
нийгэмлэгийн тэргүүн, Анагаах ухааны доктор профессор, элэг судлаач, хануур
заслын мастер багш Г.Машбат аймгийн уламжлалт анагаах ухааны эмч, ажилтнуудад
болон иргэдэд эрүүл мэндийн үйлчилгээ үзүүлэх, эрүүл мэнддээ хэрхэн анхаарах
талаар дэлгэрэнгүй мэдээлэл хийжээ.
Тодруулбал, эмч, эмнэлгийн ажилтнуудад “Нөлөөлөл 2025”,
“Элэгний В,С вирусний шалтгаант халдварын үеийн хүндрэл, хавдраас урьдчилан
сэргийлэхэд уламжлалт анагаах ухааны эмчилгээ”, “Хувь хүний өвөрмөц чанарыг
хэрхэн тодорхойлох вэ?” сэдвээр илтгэсэн бол иргэдэд уламжлалт анагаах ухаанд
хувь хүний өвөрмөц чанарыг тодорхойлж, идээ ундаа, явдал мөрөөр өвчнөөс
урьдчилан сэргийлэх тухай танилцуулсан юм.
Энэ үеэр уламжлалт анагаах ухааны эмч нар иргэдэд үзлэг
хийж, өвчлөлийг тодорхойлон зөвлөгөө өгсөн ба хий, шар, бадганыг дарах идээ
ундааг сурталчлан, уламжлалт анагаах ухааны эм, танг таниулж, эрүүл мэндийн
даатгал төлөх талаар зөвлөгөө өгчээ.
Монголын нэгдмэл анагаах ухааны нийгэмлэгийн тэргүүн, Анагаах ухааны доктор профессор, элэг судлаач, хануур заслын мастер багш Г.Машбат илтгэлдээ “Уламжлалт анагаах ухаанд аливаа өвчнийг идээ, ундаа, явдал мөр, эм, засал гэсэн дөрвөн ерөндгөөр эмчилдэг. Идээ, ундаа, явдал мөр гэдэгт хоолны дэглэм, өдөр тутмын амьдралын хэв маяг хамаарна” гээд зөв хооллох нь эрүүл байх үндэс хэмээн онцолсон юм.
